October 10-ah ISL khel dawn

India rama club inelna sang ber Indian Super League chu October 10, Inrinniah khelh ṭan a ni dawn a, club 13-in inelna hi an hmachhawn dawn a ni.

Season hmasaa 'tih loh aiah' tih ang chauh kha ni tawh loin, a hma ang thoa kalphung mumal tak nen, tun season ISL hi kalpui tur a ni a, club 13-te hi home & away-in an inhmachhawn ang.

Club 13-te an inkhelh kual vek hnuah, point hmu sang ber chuan ISL Shield an la leh ang a, top six-ten knockout hmangin ISL Cup la tur an zawng leh dawn bawk a ni.

ISL club-te hi Bengaluru FC, Chennaiyin FC, Churchill Brothers FC, East Bengal FC, FC Goa, Inter Kashi FC, Kerala Blasters FC, Mohun Bagan Super Giant, Mumbai City FC, NorthEast United FC, Odisha FC, Punjab FC leh Sporting Club Delhi te an ni a, relegation a awm lo ang.

Season hmasa aṭangin ISL-ah hian relegation a awm ṭan a, Mohammedan SC chu tla hmasa ber an ni. Tun season ISL-a relegation awm loh chhan hi IFL champion Diamond Harbour-in ISL an khelh dawn loh vang a ni.

Kolkata club hian participation fee an pek theih loh avangin ISL hi an khel dawn lo a, hei vang hian ISL aṭanga tla sa an ni tihna a ni - tun season-ah ISL club tan hlauhthawn tur a awm dawn lo tihna a ni nghal bawk.

Hetihlai hian Jamshedpur FC chu tihtawp a nih avangin tun season ISL-ah hmuh an ni dawn lo a, Churchill Brothers chuan an hmun ruak an luah dawn thung. Goan club hian JFC-a 100% stake chu leiin, ISL-ah hian an inlan dawn a, an phur khawp ang!