Mourinho-a Real ngamtu Betis

Spanish club lian Real Madrid chuan Zirtawpni zan khan tun season-a an tlawm vawi khatna an tawng a, Jose Mourinho naute hian 1-0 in Real Betis an hneh lo. Betis tan Mourinho-a player hlui Troy Parrott-a'n goal awmchhun a khung a, khualmualah Real an tuk zal.

Inkhel chu

Estadio de La Cartuja-a inkhelah mikhual team-in inkhel an thunung zawk a, chance an nei nghal mawlh mawlh. Minute 10-naah Dean Huijsen-a'n keeper chauh a hmachhawn hnuah goal a khung thei lo.

Minute nga hnu lawkah Vinicius Junior-a'n goal ruakah a khung thei lo a, Brazilian forward hian goal ban a pet per. Tun season-a goal li khung tawh Kylian Mbappe pawhin penalty spot zawn vel aṭangin defender a pet per a, a per chu pet leh nghal mah se defender dang a pet per leh tho.

First half tawp hmain Arda Guler leh Jude Bellingham ten chance nei ve mah se, goal zawnah an pet thei lo ve ve. English midfielder hian corner aṭangin ṭha zetin tauh mah se, Betis keeper Álvaro Valles-a'n a aia ṭhain a dang a, goal lut loin chawlhlawk an hmang.

Vanduaina

Second half-ah erawh first half nen khaikhinin chance a tam tawk lo a, Mbappe-a'n chance ṭha ber neiin keeper chauh a hmaah awm mah se a pet na tawk lo a, Valles-a'n awlsam takin a man.

Betis hun a thleng ve thung a, minute 81-naah Nelson Deossa ball tauh chu Thibaut Courtois-a'n ṭha zetin dang mah se, a per let chu ven loha awm Parrott-a'n rang takin a khung a, Belgian keeper tan dan ngaihna a awm tawh lo.

Minute 86-naah Vini Jr. cross chu Espanyol laka chakna goal khungtu, Carlos Espi-a'n mawi takin volley goal mah se a offside avangin pawm a ni lo. Hun tawp dawnah Vini-a penalty hlawh chhuah chu Mbappe-a'n a hlah a, hun a tawp zui nghal avangin Real Madrid an chak lo.

Mourinho a lawm lo

Real manager Mourinho chuan inkhelh banah, "Ka player ten an theihtawp an chhuah a, chak pawh kan phu. Mahse kan phu zawk avanga point hlawh chhuak ngawt thei kan ni lo. Draw tum chauh khel, mahse goal an khung palh hlauh avanga chak zawk Betis ka lawmpui e," a ti a, chak phu zawkah a inngai.

Portuguese manager hian inkhelh laia Betis defender, Fran García tlu chu tiderah ngaiin hnai takah a an khum a, yellow card a chawi nghe nghe. Espi-a goal khung chu offside lo angah a ngai a, Mbappe penalty pet chu Marc Bartra lo tlan luh hma bik avangin pet nawn tur a ni, a ti bawk.

Chakna goal khungtu Parrott hi Tottenham Hotspur-ah Mourinho nen an lo inhrawn tawh a, kum 63 mi manager hian professional-a a match hmasa ber pahnih chu 2019-a Spurs a enkawl laiin a lo khelhtir tawh. Kum sarih a liam hnuah a pu hlui lakah chakna goal a khung a, Mourinho-a'n an chak loh a la na zual ang.

Engtin zel?

Los Blancos hi an chak loh avanga indawm kun hman an ni lo a, September 8, Thawhlehni zan dar 12:30 hian Champions League-ah Inter Milan nen an inhmachhawn dawn avangin an inbuatsaih lehnghal a ngai.

Betis lakah goal hmaah an vanduai takzet a, an chak loh chhanah a ngaih theih.. Italian champion lakah chak an duh a nih chuan an chance neih ho an hlah mai mai a thiang tawh dawn lo.