Inter 'comeback' puitu Martinez

Inrinni zan Serie A inkhelah champion lai Inter Milan chuan champion tura rinkai zinga mi Napoli chu 3-2 in an hneh a, inkhel hmuhnawm takah Napoli-in goal khung hmasa mah se, a tawpah Lautaro Martinez-a'n chakna goal khungin Inter an ding chang zawk.

Napoli-in Matteo Politano leh Rasmus Hojlund ten goal hmangin hma an hruai hmasa a, mahse Inter tan Martinez-a goal hnih leh Marcus Thuram-a goal khat khung hmangin an lehthal.

San Siro-a inkhelah first half-ah goal a lut lo a, Gli Azzurri (Napoli sawina) tan minute 50-naah Politano-a'n goal hmasa ber khungin minute hnu lawkah Hojlund-a'n an hmahruaina a belhchhah a, an chak mai a rinawm hman.

Inter-in an mualah awlsam taka tlawm mai an tum bik lo a, minute 56-naah Martinez-a'n an siphurh a sut ṭhen. Minute 82-naah Thuram-a'n goal kilah tak tauh lutin, an siphurh a sut zo.

Team pahnihte 2-2 in an ṭin tawh mai dawnin a lang hman a, mahse injury time-ah Martinez bawk a inlar. Argentine forward hian buai nuai nuai karah a tlawh goal a, Napoli tan sut leh ngaihna a awm tawh loh avangin Cristian Chivu-a naute an chak.

Match thum khelh tawhah Inter hi an la chak vek a, mahse AS Roma chu Inrinni zan vek khan 2-1 in Atalanta lakah hnehna an chang a, goal difference-ah an ṭhat zawk avangin pahnihnaah an awm.