Bayern-in Karius paltlang thei lo

German champion Bayern Munich chuan Inrinni zan khan Schalke chu goal awm loin an inhnehtawkpui a, an mikhualna ramah goalkeeper Loris Karius-a lakah goal an khung thei lo. Bayern tan match 59 hnua goal an khung lohna hmasa ber a ni.

Dan pangngaiin Bayern-in inkhel an thunun zawk a, 76% zet ball an chang. League nomawi kawl mektu hian chance insiam an harsat lo a, mahse goal an khung thei lo a, Schalke keeper Lloris Karius a che ṭha hle.

Bavarians tan Nathaniel Brown-a'n hnai tak aṭanga a ball pet kawh tak chu Karius-a'n a dansak a, save ropui bika chhiar tlak a ni. Bayern chance ṭha ber erawh Luis Diaz-a'n a hlah a, Colombian forward hian Liverpool keeper hlui chiah a hmachhawn hnuah vawi hnih a hlah.

Mualneitu Schalke erawhin chance an nei ve meuh lo a, mahse an lamah goal an luhtir duh bik lo. Bayern forward Michael Olise leh Harry Kane te shot chu kum 33 mi Karius-a'n a dansak leh a, hun tawp thlenga goal an khung theih loh avangin Vincent Kompany leh a nauten point khat bak an hlawh chhuak thei lo.

Hnehna chang zo lo mah se Bayern-in lawmna tur an nei tho a, thluak lama harsatna nei Jamal Musiala a inkhel leh tawh. Kompany-a'n German midfielder chhawr chu 'risk' a nih tur thu sawi mah se minute 55-naah Lennart Karl a thlak a, hun tawp thlengin a khel tluan a, harsatna a nei lo.

Bayern hian September 10, Ningani zanah Champions League-a an match hmasa ber an khel dawn a, Norwegian club Bodo/Glimt an mikhual dawn. Bodo/Glimt hi club lian ni lo mah se season hmasaa Manchester City, Atletico Madrid leh Inter Milan hneh theitu an nih avangin zuam sual theih an ni.