Pro Fight: Boxer 278-in inelna hmachhawn dawn

Mizoram Labour Link LPS Pro Fight-a tel tumten September 4, Zirtawpni khan LPS Arena, Falkland-ah inbukna leh medical test neih an nei a, hming pe lut zingah kal lo leh tling lo an awm hnuah mi 275-in inelna an hmachhawn thei dawn a, champion lai boxer pathum nen 278 an tel dawn.

Pro Fight vawi 12-naa hian hming pe lut ṭhahnem hle mah se, inelna hnuhnung ber 2024-a tel zat (286) aiin an tlem dawn. Weight hrang panga zingah fly tam berin 74 an tel dawn a, light-in dawtin 61 an inbuk a, bantam-ah 58, welter-ah 55 leh middle-ah 27 an inel dawn.

Champion lai pathum - Lalrinngheta (fly), Lalkhawngaiha (light) leh F. Lalthanliana Junior (middle) te chu title humhim turin a tawpah an inlan dawn a, bantam champion lai Laldinsanga'n a title kawl lai kalsanin a tel dawn lo a, welter title kawltu Lallawmawma'n a category thlakin light-ah a insawn.

Flyweight kawnghren kawl mektu Tuipui boxer, Rinngheta hmachhawn tura hming pe lut zingah seeded pariat an awm a, an zingah title fight vawi hniha tlawm zawn tawh Vanlalenkawltira a langsar ber.

Dinsanga kalsan bantam title lak tum zingah seeded paruk an awm ve thung a, Siaha boxer beiseiawm L Joseph Buihringpachha leh 2023 title fight-a inlan tawh Pangzawl fighter Ramdinthara bakah, amateur boxing-a sulhnu nei tha Lalruatfela, Phainuam te chu rinkai zinga mi an ni.

Light-ah seeded pariat an awm a, welter champion lai Lawmawma bakah title fight hnuhnung vawi hniha chak zo lo C. Lalhruaitluanga (Cherhlun) leh tun hnaia hmasawn tak, "Diesel Engine" tia hriat hlawh Chhiahtlang boxer Lalruatmawia ten Khawngaiha champion kawnghren chhuhsak an tum dawn.

Welter-ah Lawmawma kalsan champion kawnghren inchuh tur zingah, weight hrang pahniha champion tawh HC Lalramfela, Zoremsanga leh national gold medal dawng tawh Lalnunzira te an tel dawn.

Middle-ah title fight hnuhnung bera Thanliana laka a tlawmna chhang let turin C. Lalhruaitluanga (Chawngtlai) a inbuk a, Hruaia hian Pro Fight-a a hun tawp lam tur a nih thu a sawi tawh avangin ngaihven a hlawh ang.

September 8, Thawhlehni zan dar 8:00-ah LPS Arena-ah inhnek ṭan a ni dawn a, vawiin chawhma dar 10:00 hian LPS Office, Zarkawtah fixture tarchhuah a ni dawn a, social media-ah puanzar a ni dawn bawk.