PSG an la chak thei lo

Ligue 1 champion lai Paris St-Germain chu season tharah chak ni hmel an la hmu thei lo a, Inrinni zan khan 2-1 in Monaco an hneh lo leh tawh. PSG hian match thum an khelh tawhah point hnih chiah an la hlawh chhuak.

French champion tan Marquinhos-a'n minute 31-naah hmahruaina goal a khung a, inkhel thununtu an nih avangin PSG an chak ve tawh dawnin a lang hman. Mahse Flavio Nazinho leh Stanis Idumbo te goal hmangin Monaco-in an lehthal.

Luis Enrique naute hian vawi 21 zet shot nei mah se goal khat bak an khung thei lo a, Monaco erawhin goal zawna an pet vawi hnih chu goal-ah an chantir thei thung.

Tlarhma an neih ṭhat avanga club dang hlauh rawn PSG forward te an che hleithei lo a, nipui laia an lak thar Ferran Torres chu a match hmasa bera goal hnih a khung bak thil ropui a la ti thei lo a, Mika Godts-a'n goal a la khung thei lo.

Hei bakah hian Ballon D'Or kawl mektu Ousmane Dembele a la nil a, French forward bakah hian Khvicha Kvaratskhelia leh Desire Doue ten season tharah goal an la khung lo bawk.

PSG hian season ṭan nan French club liana chhiar ngam Rennes, Lille leh Monaco te an hmachhawn nghal a, mahse an player neih dan enin chhuanlam siam thei an ni lo. September 9, Nilaini zan hian Champions League-ah Slovan Bratislava an mikhual dawn a, Slovakia club lakah insiamremna hun ṭha an nei thei ang.