London khawpuiah Laipui a puak

Premier League champion Arsenal meuh chu dang theitu an la awm lo. Gunners hian Pathianni zan Premier League inkhel hmuhnawmah Chelsea chu 2-1 in an hneh a, league match thum an khelh tawhah an la chak vek.

Chelsea hian Morgan Rogers hmangin goal hmahruai khung mah se, Arsenal tan Kai Havertz leh Martin Ødegaard ten goal khat ve vein an chhanglet a, 2-1 in an chak.

Arsenal-in match thum aṭangin point kua an hmu a, Chelsea erawh league match hnih a zawna an chak hnuin an tlawm ve ta. Xabi Alonso tan fiahna a inṭan a, Spanish manager hian hnathawh tur a la ngah hle!

Gunners hian Nilaini zanah Champions League khel turin Napoli an lenchilh zui dawn a, Chelsea hian League Cup third round-ah Leeds United an mikhual dawn thung.

London is Blue?

Emirates Stadium-a inkhelah mikhual Chelsea an tlangnel a, goal khung turin hun an mamawh rei lo. Minute hnihna lekah Reece James-a freekick pet chu Gunners hian an 'clear' ṭha thei lo a, hrem an ni zui.

Arsenal aia Chelsea thlangtu Morgan Rogers chuan ball-in lei a tawh hmain Arsenal goal-ah a thlawh a, David Raya-a'n tih theih a nei lo. Rogers hian Chelsea a pan khan, "London-a club lian ber ka zawm," a ti a, Emirates Stadium-ah ngei a goal khung a lawm leh sak.

Gunners ṭantute tan pai dam theih a ni lo a, minute 25-naah an rilru na chu thawi damin a awm. Declan Rice-a ball pek chu Kai Havertz-a'n goal-ah a pet a, nem hret mah se, Blues keeper Emi Martinez-a'n a dang thei lo a, 1-1 a ni.

Hei le Chelsea

Chelsea-in chak ngei an duh a, khualmualah Arsenal an nawr ngam. Mahse, captain James-a shot chu Raya bawkin ṭha zetin a dang a, Pedro Neto-a'n ṭha taka ball a tlanpui hnuah post a pet per bawk.

Vanneihnain Chelsea lam an ṭang ta lo em ni chu aw, tih mai tur a ni a, Arsenal erawh a hunah tak an par leh ta. Minute 50-naah captain Odegaard a inlar a, Christos Tzolis-a siamsak chu goal-ah a chantir.

Norwegian midfielder goal khung theih nan Havertz chuan mawi zetin a lo 'dummy' zeuh a, Arsenal player an inman tih a lang - hun tawp thlengin goal dang a lut lo a, 2-1 in Arsenal an chak.

Beiseina

Arsenal-in duhthusama ṭhain season bul an ṭan a, Chelsea erawh an elpui team lakah chak zo lo mah se, season hman zawh takah point 33 ngawta Arsenal an thlauh dan en chuan, hmasawnna tam tak hmuh tur a awm.

Martinez-a'n Havertz-a goal khungna kawngah a tiṭha tawk lo, tia sawi theih ni mah se, hun tam zawkah a che ṭha a, a team chakpui ta chiah lo mah se, Robert Sanchez aṭang chuan 'upgrade' a ni tih chiang takin a lang.

Arsenal-in nipui transfer-ah an duh ang striker la lo mah se, goal khung tur an nei tih an pholang nawn a, Alonso tan erawh tlarhnung phui dan ngaihtuah vat a ngai - league match thumah goal sarih an chhuah tawh!