A mawngphaha awm tur zawnna - Kanan FC vs Saikhamakawn FC

Star Cement MPL13-ah vawiin chawhma dar 11:30 hian Kanan FC leh Saikhamakawn FC te an inkhel dawn. Kananin point an la hmu lo a, goal difference nei chhe mah se MPL-ah head to head en a ni. KFC hian Saikhamakawn hi an hneh a nih chuan table mawngphah chhuahsanin pasarihnaah an awm ang.

Kanan hian goal khung an harsat a, goal chhuah an awlsam thung. Match li chauh an la khel chungin tun ṭum inelnaah goal 16 an chhuah der tawh a, match tina goal li chhuah ang an ni. Chutihrualin hian Kanan hian team ṭha pahnih Aizawl FC leh Chanmari FC te an hmachhawn tawh a, sulhnu nei ṭha pahnih club lakah hian goal nga ve ve an chhuah.

KFC hian insiamṭhat an duh a nih chuan tlarhnung an tihphui a ngai a, inkhel chawhnu lamah tha an thlah lo a ṭul bawk. Inkhel hnuhnung pathumah goal 11 an chhuah ang a, heng goal 10 hi second half-a an chhuah vek a ni. Tuna Kanan dinhmun hi chhe viauin lang mah se awlsam taka la siam ṭhat theih a ni a, Saikhamakawn an hneh a nih chuan boruak ipik zualpui chu an vai kiang thei ang.

Saikhamakawn tan pawh tun hun insiamṭhatna hun ṭha tak a ni a, coach Lalrindika Hmar hote hi an khelh tawh dan thlirin relegation zone-a awm tur an ni lo. SKK hian Dinthar 3-0 a an hneh hnuah Mizoram Police 2-1 in an hneh lo a, an penalty chawi dan erawh pawm harsa an ti dawn.

Mahse, tunah chuan thil kal tawh vanga chhuanlam siam hun tawh lo a, khelmualah result ṭha neih a ṭul. MPL13-ah K. Lalremmuana a che ṭha a, result ṭha neih an tum a nih chuan Vanlalthanga a chet ṭhat a ṭul dawn. Chhun pachang aṭangin Durtlang Football Stadium-ah inkhel hmuhnawm thlir tur a awm dawn e.