Barcelona dang thei an la awm lo

Spanish champion Barcelona chuan season tharah chak loh an la nei lo a, an record chhunzawm turin Pathianni zan khan 5-0 in Valencia an hneh. Hansi Flick-a naute chiah hi La Liga khelh meka hnehna chang vek awmchhun an ni.

Barca tan Lamine Yamal-a'n goal hnih a khung a, Fermin Lopez, Raphinha leh Pedri ten goal khat ṭheuh an khung bawk. Mualneitu Valencia erawhin an mualphona hliah turin goal khat pawh an khung thei lo.

Champion lai

Estadio de Mestalla-a inkhelah goal a lut hma a, minute rukna lekah Yamal-a'n Fermin hnen aṭanga a ball hmuh chu tawih takin keeper a pet khumin bul a ṭan. Minute 22-naah Fermin-a'n box chhunga Valencia player inhnawh karah, a awlah tak mawi takin goal kilah tak a pet lut a, an hmahruaina a belhchhah.

Catalan club-in inkhel an thunun chhunzawm a, Lamine Yamal-a'n chance duhawm vawi hnih a hlah a, Spanish forward hi a vannein ṭum chu ni se first half-a hattrick a siam thei hial ang.

Valencia pawh chance nei lo tawp an ni bik lo a, Arnaut Danjuma chuan Barca keeper Joan Garcia chiah a hmachhawn hnuah Spanish keeper a paltlang thei lo. Dutch forward hian penalty beisei mah se pek a ni lo.

First half tawp hma hretin Fermin-a'n goal a khung belh leh teuh hle a, defender pathum a paltlang hnuah goal ban a pet per. Kum 23 mi midfielder hi khel ṭha hle mah se a vanneih zan a ni lo. 2-0 in chawlhlawk hman a ni a, chak tur a chiang tith der tawh.

Barca nge nge

Second half-ah pawh dan pangngaiin Barca bawkin inkhel an thunun zawk a, minute 50-naah goal an khung leh nghal. Fermin thawhrah sengin Raphinha chuan hnai tak aṭangin an goal thumna a khung.

Brazilian forward hian tun season-a goal ruk a khungna chiah a ni a, striker an neih loh laia no. 9 position chelhtu niin a che ṭha a, an striker thar Gabriel Jesus tan pawh nek chhuah a harsa ang.

Hun tawp dawn hnaihah Barca an phur zual a, minute 79-naah Pedri-a'n an goal lina a khung. Goal khung tura Dani Olmo nen ball an inpe chu a class hle. Barca an phur laklawh a, minute nga hnu lawkah bul ṭantu Yamal-a'n a tawp a khar a, hun tawp thlenga goal dang lut tawh loin nuamsa takin Barca an chak.

Flick a lawm

Barca coach Flick-a chuan, "Kan khel ṭha takzet a, duhthusam erawh a la ni lo. Kan chungnung zawk a, inkhel thunun tak chunga hmun awl zawn kha ka duh dan a ni a, chu chu kan tihlawhtling bawk. Mahse engmah hi dik famkim thei a awm bik lo a, hmasawn zelna tur kan la neih avangin ṭan kan la leh ang," a ti.

Arsenal aṭanga an lak thar Jesus chu a vawi khat nan a inlan a, Brazilian forward hian minute 80-naah Pedri a thlak. Kum 29 mi Jesus-a'n goal khung turin hun a hmang hnem tawk lo.

Season kal mekah Barca hian match li an khelh tawh aṭangin goal 17 zet an khung tawh a, an lamah goal hnih chiah a lut bawk. Nipui transfer-ah Robert Lewandowski, Ferran Torres leh Marcus Rashford ten chhuahsan mah se harsatna an tawk lo.

Barca hian naktuk zan dar 10:15-ah Champions League-a an match hmasa ber an khel dawn a, Dutch club Feyenoord an mikhual dawbn. Feyenoord hi an player hlui Giovanni van Bronckhorst-a enkawl a ni.