Italian GP-ah Antonelli a chak
Mercedes driver Andrea Kimi Antonelli tluk zo an awm thei meuh lo a, Pathianni zana Italian Grand Prix-ah hnehna a chang. Kum 19 mi Antonelli hi Italian driver zingah mahni rama pakhatna ni thei hmasa ber a ni.
Autodromo Nazionale Monza-a intlansiakah Antonelli-a'n bul a ṭan ṭha tawk lo a, a teammate George Russell, Alpine driver Pierre Gasly leh Ferrrari driver Charles Leclerc te chu a tir lamah an inel ber. Mahse Leclerc hi lap thumna lekah a chesual a, a tlan chhunzawm thei lo.
Lap 18-naah Antonelli a inlar ṭan a, a teammate Russell lehpelin a vawi khat nan hma a hruai, Mahse Russell a beidawng mai lo a, kum 28 mi driver hian lap 22-naah hmahruai lehin hun tam zawk hmahruaitu a ni chhunzawm.
Silver Arrows (Mercedes sawina) driver pahnih hi an inel tluan zak a, lap 50-naah Antonelli-a'n a hmahruaina la letin a inthlahdah duh tawh lo a, pakhatna ni zuiin Russell chu a ṭhianpa dawtah hian a thleng. Driver pahnih inthlauhna hi second thum chauh a ni.
Antonelli chuan, "Ka mumang ang mai niin ka ngai, mahni ram leilung ngeiah harsa takin hnehna ka chang a, ka teammate Russell a ṭhat em avangin inelna awlsam lo tak a ni. Pakhatna ka ni thei hi ka hlim takzet a, a awihawm loh hial zawk," a ti.
Red Bull driver Max Verstappen chu pathumnaah thlengin tun season-a podium vawi nga a lawnna chiah a ni a, hnehna a la chang lo thung. Champion lai Lando Norris chu palinaah a thleng a, McLaren-a a teammate Oscar Piastri chu a dawt chiahah a thleng bawk.
Ferrari driver Lewis Hamilton chu parukna niin intlansiak ṭantirha che ṭha tak, Gasly chu a inthlahdah avangin pasarihnaah a thleng thei hram bawk. Hetihlai hian Isack Hadjar aia tlan Liam Lawson chu 14-naah a thleng a, New Zealand driver hian Dutch GP-a a position (7-na) aia a leta hniamah a awm.
September 13, Pathianni zanah Spanish GP neih leh nghal a ni dawn a, driver ten chawlh an nei rei dawn lo hle. Drivers table leh Contructors table-ah Mercedes hi hmahruaitu an ni mek a, an inthlahdah loh chuan team dang tan lehpelh an har tawh ang.