Vardy-a'n Burnley a zawm

English striker Jamie Vardy chuan free transfer-in Championship club Burnley a zawm a, tun season tawp thleng Clarets-a tana khel turin contract a ziak.

Kum 39 mi Vardy hian season hmasa khan Italian club Cremonese tan a khel a, season tawp ruala a contract a zawh hnuah club nei loin a awm. Leicester City striker hlui hi West Ham leh Everton nen pawh sawizawm a ni hman a, mahse Burnley a zawm ta zawk

Vardy chuan, "He club hian inrelbawlna mumal tak an nei a, fans pawhin football hmangaihna tak tak neiin an club tana theihtawp chhuahtu neih an phu. Chumi tur chuan ka phur tawh takzet a, a sang thei ang ber thlenpui ka tum dawn," a ti.

Kum 13 chhung Leicester tan a khelh chhungin Vardy hian match 500 khelin goal 200 zet a khung a, rinkai ni lo mah se Foxes chu 2016 khan Premier League-ah a champion pui a, 2021 khan FA Cup-ah a champion pui bawk.

Nikum September khan King Power Stadium chhuahsanin Cremonese a zawm a, Serie A club-ah hliam vangin buai zeuh mah se match 29 aṭangin goal sarih a khungsak hman tho.

Burnley coach Nicky Hayen chuan, "Vardy te ang tawnhriat ngah leh hruaitu ṭha kan chang thei hi ka vannei hle a, he club tan hian player pawimawh tak a nih kan beisei," a ti.

Tun season-ah Clarets hian match nga khel tawhin chak an la nei lo a, point hnih chiah an la hlawh chhuak. Table-ah a mawng berah an awm mek a, Vardy-a'n khai chhuah a tum dawn.