Zanin aṭangin LPS Pro Fight ṭan dawn
Mizoram Labour Link LPS Pro Fight chu zanin dar 8:00 hian LPS Arena Falkland-ah ṭan a ni dawn a, a ṭan zanah hian inhnek 10 awmin mipui ngaihven hlawh Lalremthanga Hmar a inlan nghal dawn. Comedian Search aṭanga hriat lar Remthanga hian bout hnuhnung berah Khamsuana a hmachhawn ang.
En man a awm lo
Inelna ṭan zan hian weight hrang pangaah inhnek a awm vek dawn a, en man a awm dawn lo. Zanin aṭanga September 10, Ningani zan thlengin a hmunah man chawi loin a duh apiang tan en theih a ni dawn a, zan lina - Zirtawpni zan aṭangin a hmuna en tur tan ticket Rs 50-in lei tur a ni tawh dawn thung.
Pro Fight vawi 12-naah hian boxer 278 telin inhnek vawi 273 a awm dawn a, a tir aṭanga round of 16 thlengin round thum an khel ang a, quarterfinal aṭanga title fight thlengin round li a ni tawh dawn.
Weight tinah sulhnu leh tawn hriat nei ṭhate seed pek an ni a, fly, bantam leh light-ah seeded boxer pariat ṭheuh awmin welter leh middle-ah pali ve ve an awm a, anni hi round of 16 aṭangin an inlan ṭan dawn a ni.
Zan hmasa ber aṭanga title fight thlengin inhnek zan apiangin Orient Goldsmith Fighter of the Night lawmman sem ṭhin a ni ang. LPS 1-ah Pro Fight hi live-a pek chhuah a ni dawn a, LPS youtube channel-ah member tan live-in a en theih dawn bawk. Member nih man hi Rs 179 chauh a ni.
Inhnek turte
Mipui mit fukna tur Remthanga hi bout tawp berah dah a ni a, hemi hma hian N. Lalhruaizela, Ṭawipui South leh Johan Lalrindika, ITI Veng te bakah Chawntlangpui boxer Jacob Lalduhsaka leh Vanlalpeka, Sihfa te an inhmachhawn bawk ang.
Bantam-ah inhnek vawi hnih awmin a hawn zanah hian Lalnunpuia, Rangvamual leh Joseph L Romalsawma, Bualpui NG an intawng hmasa ber dawn a, Rosangliana, Tlangsam leh C. Lalruatfela, Tuirial ten an chhunzawm dawn.
Light-ah inhnek vawi hnih tho awmin Israel Thangliana, Vanhne leh Raymond Lalenkawla, Melriat te chu an in hnek hmasa ang a, Remruatsanga, Kawrtethawveng leh Saron Veng boxer Joseph Lalchawimawia te inhmachhawn dawn bawk.
Welter-ah Vanlalhruaimawia, ITI Veng leh Ramhmingthanga Zote, Bairabi ten bul an ṭan ang a, VL Remruatfela, Mamit hmaah VMS Tluanga, Dinthar a ding ve dawn bawk. Weight rit ber middle-ah inhnek pakhat a awm dawn a, Vanlalsanga, Suangpuilawn leh Vanlaldika, East Phaileng te an inhnek ang.