Beisei pha lo IFL club Chanmari

Season liam ta khan Chanmari FC-in coach Rochhingpuia hoin I Day Football leh Mizoram Premier League-ah an champion a, tun season-ah Indian Football League khelh an tum thu an tichiang tawh bawk. Khelmual pawn lamah Chanmari hian chanchin ṭha ngah mah se khelmual chhung lamah erawh an ṭha tawk lo. Chanmari FC hian harhtharna an mamawh a, vawiin chawhma dar 11:30 hian Ramthar Veng an hmachhawn dawn.

Zo Clasico-ah Chanmariin Dinthar an hneh lo a, I Day Football-ah an hneh tawh loh bawk avangin Maimawms laka tun season-a vawi hnih an tlawmna a ni. Chhinga hote hian point sarih chauh an la hmuh avangin pathumnaah an awm mek a, an hmelma Aizawl FC an phak lohna chu point nga tling der tawh. Chanmari hian Inrinni chhunah Aizawl FC hi an hmachhawn dawn a, an inkar tihzim an duh a nih chuan Ramthar Veng lakah point thum hlawhchhuah ngei an tum ang.

Chanmari hian I League bakah ISL thlenga tawnhriat nei ṭha Lalliansanga Renthlei an lalut a, Aizawl FC forward hlui R. Ramdinthara (Tharpuia) an la lut bawk. Lunglei tlangval Liansanga hmang hian midfield thuam chak an tum dawn a, Tharpuia an lakluh avangin an goal bawh a na sawt dawn. Mahse, Ramthar Veng lakah chuan an player neihsate chungah rinna an nghah a ṭul ang.

Ramthar Veng hi Chanmari leh Aizawl FC el pha ber tura ngaih an ni a, mah se Aizawl FC lakah dawl zawrin an zawr. AFC hian Ramthar Veng hi 5-0 in an sawp a, Chanmari tan pressure petu a ni ngei ang le.