A sang pali zingah Saikhamakawn

Star Cement MPL13 boruak a hot ṭan a, Durtlang Football Stadium-ah inkhel hmuhnawm chhawpchhuah a ni. Nimin chhun khan Saikhamakawnin table mawngphaha awm Kanan FC 2-0 in an hneh a, point ruk hmuin table-ah palinaah an invawrhchho. SKK tan hian Vanlalthanga leh C. Malsawmdawngkima (Duata) ten goal an khung a, point thum hlu tak an hlawh chhuak.

Coach Lalrindika Hmar kaihhruai Saikhamakawnin season bul an ṭan ṭha tawk lo a, Kanan FC an hneh lo a nih chuan table mawngphaha awm thei dinhmunah an ding. Chak mamawh SKK-in game ṭha ber an khel lo a, Kanan an khel ṭha zawk. Mahse, first half injury time-ah dinglam aṭangin Lalrothlanga ṭha takin a lalut a, a ball cross ṭha bik chu Vanlalthanga'n a tauh lut.

Hun chanve hmalamah hian SKK tan K. Mama'n chance ṭha hlah mah se Kanan chance hlah a uiawm zawk. Hlutea freekick pet chu SKK keeper Lalhruaitluanga Kawlni-in (Bawihpuia) ṭha tak a dan hnuah Stain Lalṭanfela'n goal ruakah cross bar a pet per. Man of the match-a thlan SKK keeper Bawihpuia a che ṭha a, goal hmaah Kanan an hriam tawk lo bawk.

Siphurh sut tumin Kananin nawr na viau mah se SKK vuak let an dang zo lo. Injury time-ah SKK forward Rorelliana'n defender ṭha taka bum hnuah keeper chiah a hmachhawn a, duhsak takin Duata a pe a, ani hian goal ruakah a khung.

Saikhamakawn hian match nga aṭangin point ruk an hmu a, Dinthar FC nen an point hmuh zat inang chiah mah se head to head-ah an ṭha zawk. Coach Rindika hote palinaah an awm lai lawk a, Kanan an hneh avangin relegate lam thlirin semifinal lam an thlir thung ang.