Mizoram Police nge nge

Star Cement MPL13-ah Mizoram Police-in nimin tlai khan Lawngtlai club MLS FC 3-0 in an hneh. Durtlang Football Stadium-a inkhelah Police tan Lalfakzuala, Malsawmfela leh Lalbiaktluanga ten goal khat ṭheuh an khung a, pahnihnaah dinhmun an sawhnghet.

MLS lamin chak ngei tumin bul ṭan mah se Police khel a nghet tawh. Mizoram football history-a team ropui ber zinga mi Police hian khelmual chhungah an puitlinna a lang a, player ṭha bik an kawl bawk.

Tawnhriat nei ṭha Lalfakzuala a dam ṭha leh tawh a, Armed Veng forward hian minute 27-naah freekick aṭangin mawi zetin a khung. Police vanneih ṭum ni se, first half-ah goal dang khung belh tur an ni a, freekick aṭanga bawka an goal khung chu referee-in MLS keeper laka foul a awmah ngaiin goal-ah a pawmsak lo.

Second half ṭan aṭanga minute rukna lekah MLS captain Lalbiakzuala handball vanga an penalty hmuh chu Malsawmfela'n goal-ah a chantir a, 2-0 a ni. Police tan kum naupang zawk player-te an che ṭha a, nimin inkhelah Lalbiaktluanga a nung hle. Tluanga hian minute 70-naah a penalty hlawhchhuah chu goal-ah a chantir a, Police 3-0 in an chak.