PSG tan insiamṭhatna hun

Paris St-Germain chuan zanin dar 12:30 hian tun season Champions League-a an match hmasa ber an khel dawn a, Slovak club ŠK Slovan Bratislava an mikhual dawn. Tun season-a chak la nei lo PSG tan insiamremna hun ṭha a ni thei ang.

Nipui transfer laiin PSG hian Maghnes Akliouche, Ferran Torres, Mika Godts, Lucas Digne, Khalil Ayari leh Alessandro Longoni te an la lut a, Bradley Barcola, Goncalo Ramos leh Lee kang-in te chhuak mah se an neih sa an ṭhat tho avangin beisei an sang.

Mahse Ligue 1 match hmasa pahnihah Rennes leh Lille te an inhnetawkpui a, Luis Enrique-a'n a naute a chhan. Mahse an match thumnaah AS Monaco chu 2-1 in an hneh lo a, Spanish coach-in a naute a chhan seng tawh bik lo.

PSG hi season thara an khelh tawh danah Ligue 1 champion lai leh Champions League nomawi kawl mektu an ni tih a hriat loh a, zaninah Bratislava an hneh lo leh a nih ngat chuan anmahni ṭantute lungawi lohna a zual ang.

Season tharah PSG tlarhmaten beisei an pha lo a, Ousmane Dembele, Khvivha Kvaratskhelia leh Desire Doue ten goal an la khung thei lo. An player thar Torres-a'n Rennes laka goal hnih a khung hnuah a la khung belh leh lo a, Marquinhos nen an goal khung zat a inang.

Goal venhim lamah French club hi hmasawn an ngai bawk a, tun season-ah goal nga khung tawhin goal ruk an chhuah tawh. Chutihrualin Portuguese defender Nuno Mendes a lo kir theih tawh dawn avangin an buaina a su kiang thei ang.

Tun hnaiah PSG hi che ṭha tawk lo mah se Bratislava tan hneh an awlsam dawn lo a, Real Madrid hnua a zawna vawi thum UCL champion an tum avangin Slovak club lakah chak ngei an tum tawh dawn.

September 13, Pathianni zanah PSG hian Brest an hmachhawn leh nghal dawn a, league match an khelh leh hmain season thara an khelh dan duhawm lo tak siamṭhat nan zanin baka hun ṭha hi an nei kher lo ang.