Barcelona-ah Jesus a hlim

Brazilian forward Gabriel Jesus chuan a club thar Barcelona tan mart khat chauh la khel mah se a hlim thu a sawi a, a team tan hmun chan tuma theihtawp a chhuah tur thu a sawi

Kum 29 mi forward chuan, "Barca hi ka in angin ka ngai nghal a, an khelh dan hi ka ka ngainat zawng tak a nih avangin ka hlim hle. He team-ahn hian player theihna sang tak neite an awm a, chuvangin hmun chang hnem turin ka theihtawp ka chhuah dawn," a ti.

Barca hian tun nipuiah Robert Lewandowski, Ferran Torres leh Marcus Rashford te an chhuahtir a, Jesus a luh hmain striker pangngai an nei lo. Jesus-a hnampui Raphinha chuan no. 9 position chelhin goal ruk a khung tawh a, Jesus-a tan nek chhuah a har dawn.

Chutihrualin Jesus hian Manchester City tan nomawi tam tak a lo chawi tawh a, Gunners-a a insawn hnuah Premier League a champion tawh bawk avangin Barca tan player ṭangkai tak a ni thei dawn. Mahse Emirates Stadium-a a hun tawp lamah hian hliam vangin a inlan mumal lo thung.

Man City forward hlui chuan a hliam chungchang sawi chhunzawmin, "Ka taksa a fit tawk a, mahse inkhelh tam ka la mamawh. Ground chhunga hun ka hman hnem poh leh ka inrintawkna a sang zel dawn. Mahse tun dinhmunah chuan ka team thar tan ka inlan avangin ka lawm a, chak zel turin hma ka lakpui ang," a ti.

Hansi Flick-a naute hi an boruak ṭhat lai tak a ni a, league match li an khelh tawhah goal 17 khungin goal hnih chiah an la chhuah a, La Liga-ah hnehna la chang vek awmchhun ni mekin an champion nomawi humhim turin kawng dik an zawh mek.

Catalan club hian zanin dar 10:15 hian Champions League-a an match hmasa ber atan Feyenoord an mikhual dawn a, Jesus-a'n bul a ṭan lo a nih pawhin hun a hman hnem tawh a rinawm.

An hmachhawn tur Feyenoord hi an player hlui Giovanni van Bronckhorst-a enkawl a ni a, saeson hmasa khan Eredivisie-ah pahnihna an nih theih avangin zuam chi an ni dawn lo.