Nakkum March thleng Barton tang dawn

English footballer hlui Joey Barton chu tharum thawha inbeihnaah, a inhnamhnawih avangin kumin chhung taninah a tang dawn a, nakkum March-a trial an neih leh hma chu thuneituten an kawl dawn.

Kum 44 mi Barton hian kumin March khan 'non league' football manager hlui, Kevin Lynch nen Huyton and Prescot Golf Club pawnah intibuaiin Lynch hian a mitah hliam na tak a tuar. Barton hi zu a rui nia sawi a awm a, an inbeihna hi CCTV-ah hmuh tur a awm avangin man a ni zui.

Manchester City midfielder hlui hi a chung thu ngaihtuah tu tur Judge David Potter-a'n bail chhuah a remti lo a, kumin December 11 hian pre trial neih a ni dawn a, kar hnih chhung awh tura ngaih a ni.

Judge Potter chuan Barton hi nakkum March 8-a trail an neih hma chu chhuah lailawk a phalsak lo a, Barton-a chung a pik hle. Rangers tan pawha khel tawh midfielder hian player a nih laiin, tharum thawhna vangin man a lo tawk zeuh zeuh tawh a, inkhelh a chawlhsan hnuah pawh buaina a la nei zui zel.

Tharum thawhna bakah inthapna lamah pawh sulhnu a lo nei tawh a 2017-a Burnley tan a khelh laiin 2006 aṭanga 2016 inkarah inthapnaah a inhnamhnawih tih hmuh chhuah a ni. FA chuan thla 18 chhung football leh a kaihhnawiha inrawlh thei lo turin a hrem a, £30,000 chawitir a ni bawk.

Barton hian Premier League-ah City bakah Newcastle United, Queens Park Rangers, leh Burnley tan a khel tawh a, Olympique Marseille leh Rangers-ah a khel tawh bawk. 2017-a inkhelh a chawlhsan hnuah Fleetwood Town leh Bristol Rovers te a enkawl tawh bawk.

England tan pawha vawi khat inlan ve tawh Barton hian, kum 15 a inkhelh chhungin red card vawi kua zet a hmu a, EPL bikah vawi ruk hnawhchhuah niin red card hmuh hnem lamah 10-na a ni phâk hial.