Simmons-a'n Kings a zawm

Ben Simmons chuan NBA-a lo kir leh turin thutlukna a siam fel tawh a, Sacramento Kings nen kum khat atan dollar maktaduai thum leh a chanvein an inrem. All-Star-a vawi thum lo thlan tawh hi kum khat hnuah a inlan leh dawn

Kum 30 mi Simmons hian 2024-25 season khan NBA-a a match hnuhnung ber a khel a, hemi season hian Brooklyn Nets leh LA Clippers tan a khel. Match 51 a inlanah minute 22 khel ziah ang a ni a, chawhrualin point nga leh assist 5.6 a nei bawk.

Australian point guard hian Thawhṭanni khan Sacramento-ah a zin a, medical testa neih bakah court-ah amaha inkhelin, coach Doug Christie leh club hruaitu pawimawhte nen an inhmu bawk.

Thla hmasa khan NBA journalist Marc J. Spears chuan Simmons-a'n NBA-a kir leh a rilruk thu a sawi a, inbuatsaihna a neih thu leh team takin an ngaihven thu a tarlang. Western Conference team pakhat chuan an training camp zawm turin a bik takin an sawm tih a X-ah (Twitter) a tarlang tel bawk.

Simmons pawhin 2028 Olympics-ah an ram tan khelh a châk avangin, contract an ziah theih hniam ber pawh ziah a hnial tawh lo niin khawthlang chanchinbuten an ziak hman hial Simmons hian season hmasa kha club nei loin a hmang tluan a, All Star-ah pawh an lo thlan tawh hian basketball chawlhsan a, a inkhelh zinkawng tihtawp a tum hman hial thu a lo sawi tawh.

Kum 2016-a Philadelphia 76ers-in an draft hnuah Simmons hi NBA-a rawlthar hmuhnawm ber pawl a ni a, 'Rookie of the Year' pawh a lo dawng tawh. Mahse beisei a phâ lo zui a, Brooklyn Nets leh Los Angeles Clippers-ah te insawn leh mah se ngai a awh leh tawh lo.

A inkhelh hnuhnun ber chu nikum April daih tawh kha a ni a, season khat chhung inkhel loin a awm tawh. Inkhel loin awm rei tawh mah se club tam takin Simmons an iai lo a, a lo khelh tawhna Sixers bakah champion lai New York Knicks leh Boston Celtics ten ngaihven mah se Kings a zawm ta zawk.