Red card, comeback leh substitution awmze nei

Star Cement MPL13-ah Chanmari FC tan khua a var thei lo a, champion lai hi nimin khan kai thar Ramthar Veng nen 2-2 in an inhnehtawk. Rochhingpuia hote hian Lalthanzuala leh Suanngaihmuana te hmangin ṭum hnih hma hruai mah se coach HC Zarzoliana hote hian MS Dawngliana penalty leh Stephen C. Malsawmtluanga te goal hmangin an chhanglet.

Durtlang Football Stadium-a inkhel hmuhnawm hi Zonet-in an pe chhuak thei lo a, TV crew awmna room-ah tui nasa taka a luh avangin khawl a ti chhia a, round 6 pawh live lo thei dinhmunah a ding. September 12, Inrinni tlai dar 3:00 hi Chanmari FC leh Aizawl FC inkhelh hun a ni a, Zonet-in an pe chhuak thei lo a nih chuan tualchhung football ngaina tan chuan channa nasa tak a ni ngei ang.

Aizawl FC-in coach R. Lalruatfela kaihhruaina hnuaiah inelna an thunun a, nimin tlai inkhelah Chanmari hnehtu Dinthar FC 3-0 in an sawp. AFC tan Eric Remruatpuia Chhangte, T. Malsawmzuala leh H. Lalruatfela ten goal khat ṭheuh an khung. Coach R-a hote an khel ṭha a, chutihrualin match nga an khelh tawhah goal nga an khung tlin loh vawi khatna a ni.

Chanmariin hma a hruai

Chanmari FC-in Zo Clasico-a Dinthar FC an hneh loh hnuin thawhchhuah ngei an tum a, Ramthar Veng lakah pawh bul an ṭan ṭha. Minute riatna lekah Lalthanzuala'n goal a khung nghal a, Chanmariin inkhel an thunun zui bawk. Mahse, Chanmari an vanduai a, ho lam taka penalty an chawi avangin Ramthar Vengin sut theihna hun ṭha an neih phah.

Ramthar Veng forward MS Dawngliana penalty pet chu Chanmari keeper Zothanmawia'n dang mah se a per chu Bawngkawn tlangval hian minute 38-naah a khung leh ta tho. MPL kai thar hi half time thleng an ṭang tluan thei lo a, tlarhnung phui loh vangin Suanngaihmuana'n six yard box-ah hun thawl neiin chiang takin a pet lut.

Red Card leh comeback

Second half ṭan aṭanga rei vak loah Dawngtea'n Chanmari midfielder Michael Lalbiaksanga a pet zeuh a, Michael-a thinrimin tawnhriat nei ṭha Dawngtea a nghawk. Ramthar Veng forward hian Michael hi a rek a, referee-in player pahnih hi an phu angin minute 54-naah red card a pe ve ve.

Chanmariin player 10-a an khelh hnuah pawh inkhel an thunun tho a, 2-1 in hma an hruai bawk. Mahse, coach Zara'n bench aṭangin J. Lalbiakliana (Valpuia) leh Stephen C. Malsawmtluanga te a luhtir. Ramthar Veng winger Valpuia cross ṭha chu Stephen-a'n minute 73-naah a tauh lut a, siphurh a sut.

Player 10 ve vea an khelh avangin hun thawl leh hmun thawl an nei a, Chanmariin chak tuma an nawr avangin inkhel a nung hle. Inkhel tawp dawn hnaihah team pahnihin chance ṭha an nei ve ve a, goal erawh an khung thei lo, 2-2 inkhel a tawp. Ramthar Veng an lawm a, Chanmari lam an thinur thung.