City tan hna harsa awm lo

Enzo Maresca hnuaiah Manchester City an chak zel - Premier League match thum a zawna an chak hnuah, Champions League-a an match hmasa berah City an chak leh ta a, Thawhlehni zan khan FC Porto chu 2-0 in an hneh.

City tan Erling Haaland chuan goal hnih a khung a, Manchester khaw club hi an vanneih zan ni se, hei aia tam zawk goal an khung thei hial ang - Porto keeper Diogo Costa chet ṭhat leh an vanduai a innang a, beisei angin goal an khung tam lo zawk.

Manchester City hian kartawp Pathianni zanah Manchester United nen derby match an khel zui dawn a, Enzo Maresca tan chuan match li a zawna chak hnu lawka Manchester derby khelh hi 'a hun tak' tiin a sawi theih hial ang.

Hello Haaland

City tan goal khungtu chu a ngai bawk, Haaland a ni a, Norwegian striker hian Pep Guardiola hnuaia goal khung a uar ang bawkin, Maresca hnuaiah pawh goal khung a uar chhunzawm a, tun season-ah match nga a khelh aṭangin goal nga a khung leh tawh!

Haaland hi a vanneih zan ni se, hattrick pawh siam thei hial zawk tur a ni. First half-ah chance a nei nual chungin a khung lo a, minute 47-naah Enzo Fernandez siamsak chu a tauh lut ta nge nge - hun pek belhah Rayan Aït-Nouri siamsak chu goal-ah a khung leh bawk.

Kum 26 mi Haaland hian City tan Champions League match 40 aṭangin goal 36 a khung tling ta der a, UCL-ah hian Red Bull Salzburg tan khan match rukah goal riat a khung a, Borussia Dortmund tan match 13-ah goal 15 a khung - UCL goal 51 a khung tawh tihna a ni.

City tan lawmna

Francesco Farioli enkawl Porto hi league match nga an khelh tawhah la chak vek mah se, an tan City hi an sang lutuk hret a, Haaland-a'n chance vawi tam a hlah bakah Antoine Semenyo leh Phil Foden ten uiawm takin an ti goal lo bawk - 2-0 aia tama tlawm thei an ni.

City lawmna belhchhah turin, nipui transfer-a an lakluh, Enzo Fernandez a khel ṭha thlawt a, a vawi khat nana bul ṭan Ayyoub Bouaddi sawi bo a thiang lo - vawi 55 a pass zinga 54 chu a tidik a, vawi sarih ngawt khingpui ball keng lai a chhuahsak a, vawi 13 ball inchuhah a chungnung zawk bawk.

Haaland chuan, "A khel ṭha takzet. Training-naah pawh a tiṭha ṭhin hle a, ka ngaihdan takah chuan player ṭha bik kan la lut a ni," a ti a, City boss Maresca chuan, "Hei vang hian alawm amah la lut tura kan buai em em," tiin, a midfielder thar a fak.