Kum hnih hnuah United

Manchester United chuan season hnih ngawt Champions League an khelh loh hnuah Champions League an khel ve leh dawn ta a, zanin dar 12:30 hian Old Trafford-ah Sabah FK an mikhual ang.

United hian beisei angin season bul an ṭan lo - Hull City an ngam loh hnuah Ipswich Town hneh mah se, an match hnuhnung berah Everton chu 2-2 in an inhnehtawkpui a, an vanneihna erawh club lian hmachhawn hmasa loa Sabah an hmachhawn tur hi a ni.

Sabah FK hi Azerbaijan club niin, Manchester United nen chuan khaikhin chi an ni lo - an khelmual Bank Respublika Arena pawh mi 8,969 lenna awrh a ni a, Old Trafford-ah United hian an hneh lo a nih chuan mualphona a tling dawn.

Azrbaijan champion Sabah tan tun season hi an club chanchina Champions League an khelhna hmasa ber tur a ni a, Old Trafford-a United hmachhawn ringawt pawh hi an tan chuan hlawhtlinna a tling tawh.

Hei vang hian Michael Carrick-a tan squad neih ṭhat ber thawhchhuahpui kher pawh a ngai lo ang - Pathianni zanah Manchester City an mikhual dawn a, Carrick-a tan player ṭhenkhat lo hahdamtir kha thutlukna fing a ni dawn.

Chuti a nih chuan Everton laka lakchhuah ngai Marcus Rashford hi dam tawh mah se, bul ṭantir ai chuan hahdamtir a fuh zawk a rinawm a, Leny Yoro, Noussair Mazraoui, Andrey Santos leh Benjamin Sesko ten inkhel bul an ṭan a beiseiawm bawk.

Red Devils hian UCL-ah hian Atletico Madrid leh Bayern Munich an la hmachhawn dawn a, Como, AS Roma, Sporting Lisbon, RB Leipzig leh Villarreal te pawh chetsual theihna vek an nih avangin Sabah hneh hi tihmakmawh a ni.