Khualmualah Villa an chak
Premier League club hlun Aston Villa chuan Thawhlehni zan khan Champions League-ah, Club Brugge tlawhin 3-2 in hnehna an chang a, 2024-25 season hnua UCL match an khelh leh hmasak berah an chak nghal.
Villa tan John McGinn, Emiliano Buendia leh Nicolas Jackson ten goal khat heuh an khung a, Club Brugge tan Hugo Vetlesen leh Nicolo Tresoldi te goal khung chu an mualpho lutuk tur hliahtu chauh a ni.
First half ropui
Inkhel an aṭanga minute 11-na lekah Villa-in goal an khung nghal a, captain McGinn chuan ding lam sir aṭangin mawi takin a pet kual lut. Mualneitu tan Vetlesen-a'n minute riat hnu lawkah an siphurh a sut ve leh nghal.
Belgian club lawm chhung erawh a rei lo a, minute thum hnu lawkah Buendia-a'n a team hma a hruaipui lehnghal. Argentine forward goal khung dawna thawh hlawk tak João Gomes-a che vel a hmuhnawm hle.
Villa-in an la duhtawk mai lo a, first half tawp hma hretin Pau Torres-a ball vawrh luh chu Jackson-a'n umin keeper a paltlang hnuah a khung a, first half-ah goal li a lut.
Villa an vannei
Second half-ah Club Brugge-in goal khung tumin na takin an nawr a, ball pawh an chang hnem zawk. Mahse goal hmaa an hriam tawk loh chu an vanduaipui.
Minute 61-naah Aaron Wan-Bissaka handball vangin penalty an hmu a, Tresoldi-a'n khung mah se hun tawp thlengin goal dang an khung thei tawh lo a, an mualah Villa-in 3-2 in an hneh.
Engtin zel?
Inkhelh banah Villa coach Unai Emery chuan, "Zanina kan chak hi kan khelh leh zel turah inrintawkna min petu tur a nih avangin a pawimawh takzet. Kan khel ṭha ka ti bawk.
Goal hnih khunga hma kan hruai hnua kan khelh dan erawh kan hlauhthawng tih a hriat a, mahse European inelnaa 'away team' ni chunga inkhelh a harsat ṭhin avangin ka naute ka dem lo," a ti.
Villa hian UCL an khelh hnuhnung ber khan quarterfinal an thleng a, champion zui ta Paris St-Germain chu aggregate-ah 5-4 in an hneh lo. Kuminah Spanish coach ho bawkin an thawk chhuak leh a, a a aia sang thlen ngei an inbeisei tawh ang.
Chutihrualin Emery naute hian September 12, Inrinni zanah dar 7:30-ah Nottingham Forest nen an inhmachhawn leh nghal dawn a, UCL-a an chak hi lawm hman an ni lo.