McTominay an zai hlawhtling

Italian club Napoli chuan an midfielder Scott McTominay lung an zai (heart surgery) chu hlawhtling taka zawh a nih thu an puang a, Scottish midfielder hian tun thlaah training a zawm hman an beisei.

Kum 29 mi McTominay hi August 30-a Napoli-in 2-1 a Como an hneh loh ṭum pawh khan a la inlan a, minute 56-naah thlak niin harsatna a nei lo. Mahse hemi hnu hian a lung phut dan a dik lo tih hmuhchhuah a ni a, zai a ngaih dawn avangin hmalak nghal a ni.

Napoli chuan, "McTominay hi kar hnih chhung a chawl ang a, chu mi hnuah training a zawm leh ang," tiin thuchhuah an siam a, Manchester United midfielder hlui hi October-a international break zawhah a inkhelh leh hman an beisei.

Manchester United midfielder hlui a lo let leh hun tur sawi chian theih ni lo mah se, October thla tira international break zawh velah a inkhelh leh theih an beisei thu Napoli chuan an sawi. McTominay pawhin Instagram-ah,"Kan inhmu leh vat dawn nia, a rei lo ang," tiin a post.

Scottish midfielder hi a chawlh rih a ngaih dawn avangin an ram coach thar, Sebastien Pocognoli hnuaia an match hmasa pali a khel thei dawn lo tura ngaih a ni a, an khelh tur hi Nations League group stage a nih dawn avangin Scotland tan chânna nasa tak a tling.

McTominay hian kum nga mi chauh a nih laiin Man United academy a zawm a, 2017 khan senior team tan inlan ṭanin 2024-a Napoli a zawm hma thleng khan vawi 255 a inlan hman a, FA Cup leh League Cup vawi khat ve ve a chawipui.

Serie A-a a insawn hnuah hmasawn lehzualin 2024-25 season-ah Napoli chu champion-pui nghalin, hemi season hian Serie A-a player ṭha ber 'Most Valuable Player' (MVP) chu a dawng bawk.