Car thar ṭhatlohna tilangtu Lawson leh Tsunoda –Verstappen

Red Bull driver Max Verstappen chuan an team reserve driver pahnih, Liam Lawson leh Yuki Tsunoda te chu F1 car thar ṭhat tawk lohna tilangtu tiin a sawi a, Verstappen-a lungawi lohnain kian zai a la rel thei lo.

Kum 28 mi Verstappen chuan, "Lawson hian inelna hnuhnung pahnih team a rawn zawm ve chauh a, Tsunoda pawhin Lawson-a hmun ruak a luah ve bawk. Mahse reilote chhungin vawi khat pawh an la khalh ngai loh car-ah an insiamrem thei nghal a, anmahni ka zahlohna ni lo se hetiang hi chuan inelna a tizahawm loh zawk," a ti.

August 23, Pathianni zanah Dutch Grand Prix neih hma khan, Verstappen-a teammate Isack Hadjar chuan a banrek a tihnat avangin inelna a hmachhawn thei loin a aiah Lawson a tlan a, MASCOT Circuit Zandvoort-ah pasarihna a ni phâk.

Tun Pathianni kaltaa Italian GP neihah khan Hadjar a la dam loh avangin Lawson bawk hi a tlan leh a, Autodromo Nazionale Monza-ah hian 14-na niin Dutch GP-aiin a letin a tlahniam.

Dutch driver hi tun season an hma aṭang tawh khan a lungawilohna a lantir nasa tawh a, motorsports-a thuneitu sang Fédération Internationale de l'Automobile (FIA) thil duan thar chu a duh loh zinga langsar ber a ni.

Intlansiak lamah a chet ṭhat tawk loh bawk avangin a dinhmun a chiang lo hman a, Red Bull chhuahsana Mercedes zawm tur anga sawi thawm a awm hman. Mahse Verstappen-a'n contract thar a ziak ta zawk.

Season kal mekah Red Bull hi constructors table-ah point 204 hmuin palinaah an awm mek a, an hnuai chiaha awm RB (75points) nen inthlau mah se hmahruaitu Mercedes (468 points) um phâk a harsa tawh dawn.

Drivers table-ah pawh an tlahniam hret a, Verstappen hian point 127 hmuin paruknaah a awm a, vawi nga podium lawn tawh mah se hnehna a la chang thei lo. A teammate Hadjar pawhin point 71 hmu tawhin pariatna dinhmun a hauh mek.

September 13, Pathianni hian Spanish GP neih a ni leh dawn a, Madrid-a intlansiak turah pawh hian French driver Hadjar a la inlan theih dawn loh avangin Lawson bawkin a aiawhin a tlan leh dawn a ni.