Adel Taarabt-a'n inkhelh a chawlhsan

Queens Park Rangers forward hlui Adel Taarabt chuan Thawhlehni zan khan inkhelh a chawlhsan thu a puang a, kum 20 chhung professional football a khelh hnuah a boot a khái ve ta.

Kum 37 mi Taarabt chuan, "He thawnthu tawp hun chu a lo thleng ta. Football avangin hun hlimawm tak tak ka tawng a, mi ropui tak takte nen min intawntirin ka theihnghilh tawh ngai loh tur eng emaw zat min tawntir a ni.

Club ka khelh tawhna zawng zawng, coach ka hrawn tawhte leh ka khelhpui tawh zawng zawngte bakah min lo ṭan ṭhintute chungah lawmthu ka sawi a, hun hrehawm tak tak pawh tawng mah ila ka zinkawng kha eng nen mah ka thleng phal tawh lo ang," tiin instagram-ah a post.

Morrocan forward hian 2006 khan French club Lens aṭangin a career bul a ṭan a, kum khat hnu lawkah khatih laia Tottenham Hotspur manager Martin Jol chuan White Hart Lane-ah a seng lut.

Spurs-ah hmun a chan tam loh avangin 2009 khan loan-in QPR a pan a, 2010 khan a ngheta zawmin match 109-ah goal 26 a khung a, ground chhunga a ball khawih leh mi bum a thiamna chu a larpui hle. QPR-ah hian a career-a a chet ṭhat ber ṭum a tawng a tih ngam.

QPR-a awm lai hian an coach Harry Redknapp nen an inhmuthiam lo zeuh zeuh a, 2013 leh 2014 khan season chanve chhung Fulham leh AC Milan-ah loan-in a chhuahtir. 2015 khan Hoops (QPR sawina) a chhuahsan ta nge nge a, Benfica a zawm.

Portuguese club-ah Taarabt hian beisei a pha lo a, match 79 khelin goal hnih chiah a khung. 2017-18 khan loan-in Genoa pan leh mah se ngai a awh leh tawh lo a, hemi hnu hian a career-in zuih lam a pan tial tial.

Kum 2022 khan UAE Pro League club Al Nasr-ah a lut leh a, match 55 aṭangin goal 21 khungin a che chhe hran lo. Kum thum hnuah chhuakin season hmasa khan UAE club tho Sharjah tan zawmin, a club khelhna hnuhnung ber a ni zui.

Taarabt hian age level-ah France tan inlan mah se senior-ah Morocco tana inlan a thlang zawk a, Atlas Lions tan match 30 khelin goal li a khung ve hman. 2010 leh 2022 World Cup qualifying-ah a khel a, inelnaah erawh koh a nih loh avangin a inkhelh chhungin World Cup-ah a inlan hman lo.