FA Cup-ah Rooney Vs United?

Thawhṭanni zanah FA Cup fifth round inhmachhawn tur draw neih nghal a ni a, Derby County chuan fourth round replay-ah Northampton Town an hneh thei a nih chuan Manchester United an hmachhawn ang.

Derby-ah hian United legend Wayne Rooney chu coach-player leh captain-in a khel a, a club hlui United hmachhawn hi a chak khawp ang. Manchester City vanneih a kaltluang a, Sheffield Wednesday an hmachhawn dawn. 

Liverpool-in fourth round replay-ah Shrewsbury Town hneh pawh ni se fifth round paltlang turin kalkawng a hautak dawn tih a chiang a, Chelsea an hmachhawn dawn.

 

Southampton leh Tottenham Hotspur  inkhela chak zawkin Norwich City an hmachhawn dawn a, Bournemouth hnehtu Arsenal-in Portsmouth an hmachhawn dawn avangin hmabak hautak lo tia sawi theih an ni.