UCL-ah Man United-in bul an ṭan ṭha

Manchester United-in season hnih chhung Champions League an khelh loh hnuah Europe inelna sang berah an inlan a, Ningani zan khan Azerbaijan champion Sabah FK chu 4-0 in an sawp. Old Trafford-a inkhelah hian Matheus Cunha, Bruno Fernandes, Benjamin Sesko leh Lisandro Martinez ten goal khat ṭheuh an khung.

Sabah FK hian UCL khel tur hian qualifying round pali an paltlang a, tun ṭum hi an vawi khat khelhna a ni. Kawng engkimah Man United leh Sabah inkar a zau a, chutihrualin Carrick-a hote hi an khelh ṭhat avangin Manchester Derby-ah inrintawkna an ngah sawt ang.

English manager Carrick tan erawh thutlukna harsa siam tur a la awm tho a, mual vei lama chhawr tur nghet a la nei lo. Everton nen an inhnehtawk ṭuma hliam tenau a neih avangin Luke Shaw a awltir a, aiah Patrick Dorgu a lut. Dorgu hian goal nawr pui ṭha mah se defending a ṭha tawk lo a, a thlaktu Harry Amass a khel chhe lo chungin a kum naupan vang leh tawnhriat a neih tlem vangin rin ngam a harsa dawn.

United tana chanchin lawmawm erawh goal an chhuah lo a, tun season-a an clean sheet hmasa ber a nih bakah goal khungtute hi mihrang vek an ni. Kil tin aṭangin goal an khung thei tih an lantir a, club academy aṭanga inzir chhuak Kobbie Mainoo a che ṭha viau bawk.