PSG an chak zo lo

Ligue 1 hmahruaitu Paris St-Germain chuan goal thum an chhuah hnuah sut zo leh thei mah se an chak zo ta chuang lo a, an mikhualna ramah Amiens nen 1-1 a inhnehtawkin point khat ve ve an insem.

Inrinni zan inkhelah table mawngphah lama awm Amiens hian beisei loh takin bul an ṭan fuh hle. Serhou Guirassy (5'), Gael Kakuta (29') leh Fousseni Diabate (40') te hmanga hma hruaiin an dinhmun an siamṭha hman hle.

French champion PSG lamin chawlhlawk hmain Ander Herrera hmangin an si phurh an sut ṭhen a, second half-ah Tanguy Kouassi goal hnih hmanga an siphurh an sut zawh bakah loan hmanga an hawh lai Mauro Icardi goal hmangin 4-3 in hma an hruai let daih!

Mahse, point mamawh Amiens an tlawm duh bik lo, hun tawp hma chiahin goal hmahruai khungtu Guirassy chuan an si phurh sut zo ve lehin point khat an sual chhuak, point 21 neiin a hniam ber dawt an nih chhunzawm - an hnuaiah hian point 13 chauh la hmu Toulouse chiah an awm.

Thomas Tuchel-a'n hliam dam hlim Neymar a la chhawr lo a, Thawhlehni zan hian Borussia Dortmund nen Champions League last 16 an khelh dawn avangin forward Kylian Mbappe chu hahchawlhna hun pek a ni bawk - German club lakah chuan inkhel bul an ṭan ang.

PSG hian hnehna chang zo lo mah se point 13 zetin hma an la hruai fal tho, nizan khan pahnihna Marseille chu Lille nen an inhmachhawn a, inkhel result a zirin an hmahruaina hi la tlahniam leh thei tur a ni.