Garcia a chak leh ta

Boxer ngaihven hlawh Ryan Garcia chuan welterweight chu a rorelna hmun a ni tih a pholang leh ta a, nimin khan a khingpui Conor Benn chu round hnihna lekah knockout-in, WBC welterweight title a kawl lai chu a humhim.

T-Mobile Arena, Paradise, Nevada-ah boxer pahnih an intawng a, an intawn hma hauhin Ryan Garcia hian chak tura ringtu a ngah zawk - an intawng ta chiah a, kawng tinrengah Ryan Garcia a chungnung zawk a ni ber.

Dar a rik rualin American boxer Garcia hian inhnek a thunun a, engtin nge British boxer Benn hian title fight a hmachhawn theih zawk? tiin zawhna inpe pawh ni ila, tun min dem lo ang. An inthlau em a ni!

Kum 29 mi Garcia hian round hnihnaah Benn hi a hnek tlu a, mahse, referee-in a count zawh hmain a tho ve leh mai. Mahse, Garcia-a'n hawihhawm chhuah duh loin Benn hi a attack zui a, referee-in boxer pahnih hi inhnek zui tir zel chiah a ngai ta lo - technical knockout hmangin Garcia a chak.

Garcia chuan, "Theihtawp a chhuah dawn tih ka hria a, mahse, a fimkhur tawk lo - chu chu ka laka a tihsual lian ber a ni. Hei hi ka division a ni a, champion chu keimah ngei a ni e," a ti a, a pawr hle.

American boxer-in a hneh tak Benn-a tan kum li hnua welterweight-a fight a hmachhawn leh hmasak ber a ni a, inhnek hma hian chak pawh ni se, welterweight-ah a inlan tawh loh tur thu a sawi.

Garcia-a'n fight hmain, round nga chhunga hnehna a chan tur thu a sawi a, round hnihnaah a chak - vawi 29 professional fight a hmachhawna vawi 26 a chakna chiah a ni a, vawi hnih tlawm tawhin, vawi khat chu 'no contest'-ah puan sak a ni.

Hetihlai hian a hneh tak Conor Benn tan erawh vawi 27 fight a hmachhawna vawi hnih a tlawmna chiah a ni - vawi 25 a chak tawh. Garcia-a'n he fight avang hian dollar maktaduai 30 vel a hlawha ngaih a ni a, Benn hian $15mtd a hlawh thung.