Goal khung thei lo Liverpool

Tun season-a point hlawhchhuah la nei lo Fulham-in Anfield-ah point an hlawh chhuak a, khualmualah Liverpool chu goal khung loin an inhnehtawkpui - Reds tan mualphona a ni.

Liverpool hian tun season-a an league match hmasa pahnihah Newcastle United (2-2) leh Nottingham Forest (2-2) an draw a, Ipswich Town (2-0) leh Atletico Madrid (2-1) lakah hnehna an chang zui.

Atletico hneh hlim an ni miau a, match hmasa pathuma tlawm vek Fulham lakah chak tura beisei an ni. Mahse, Reds khel a hmuhnawm tawk lo a, an player hlui Alvaro Arbeloa kaihhruai team lakah an hriam tawk lo.

Fulham-in goal khungna chance nei mah se, Jeremy Jacquet chuan Gonzalo Garcia chance neih chu goal line aṭangin a lo dang a, Josh King-a chance neih chu Alisson-a'n dansakin, Antonee Robinson chuan uiawm takin a tauh out bawk.

Liverpool tan Victor Munoz-a'n chance ṭha nei mah se, engmah lo maiah a chantir a, pound maktaduai 123 man Bradley Barcola lah a vannei thei rih lo - tun hnaia form tak Alexander Isak-a'n hmuhnawm chang nei mah se, goal a khung thei bik lo.

Dominik Szoboszlai pawhin hun ṭha nei mah se, a hun neih goal-ah a chantir thei lo a, a tawpah chuan point khata lungawi zir a ngai - Fulham-in tun season-ah a vawi khat nan point an hlawh chhuak a, Anfield-ah ngat a nih avangin an inringtawk sawt ang.

Liverpool boss Andoni Iraola chuan, "Ka player-te an chau a, thathona an nei lo tih chiang takin a lang. Darkar 60 emaw 70 emaw hnu lawkah kan inkhel leh a, a harsa ve bawk a ni.

"Hetihrual hian, hei hi chu thil thleng tur reng a ni, tih kan hriat a ngai a, kan insiamrem a ngai a ni mai. Hetiang game-ah hi chuan chak turin, set-piece emaw thil danglam bik thlentir a ngai ṭhin," a ti.

Reds hian Thawhlehni zanah League Cup third round khel turin Tottenham Hotspur an mikhual zui dawn a, insiamṭhat an mamawh.