Tottenham-in chak an la nei lo!

Nipui transfer-a pound maktaduai 300 chuang sengtu Tottenham Hotspur an la chak thei lo tluang zel a, Inrinni zan khan an mikhual Everton nen 0-0 in an inhnehtawk.

Spurs hian league match li khel tawhin, chak an la nei miah lo a, goal an la khung miah lo bawk - league-a an match hmasa palia goal khung loa hun an hman hmasak ber a ni!

Premier League bikah pawh, September 2006 hnua match li chhung a zawna goal an khung loh hmasak ber a ni bawk a, tlarhmaa pound maktaduai 100 tel seng team tan chuan a inhmeh lo hle.

Spurs-in chance an neih ṭhat ber chu Jan Paul van Hecke-a'n goal-ah a chantir thei lo a, Everton tan Thierno Barry chuan uiawm takin a hlah bawk.

Tottenham hian Thawhlehni zanah League Cup khel turin Liverpool an lenchilh zui dawn a, player inrintawk loh laia lenluh nan chuan itawm lo tak a ni.

Spurs ṭantuten inkhelh zawhah an team hi nasa takin an au el a, Roberto de Zerbi chuan fan-te hnenah hian ngaihdam a dil zui. Spurs boss chuan, "Kan tihpalh a ni a, kan thiam loh a ni.

"Inkhel ṭantirah nasa takin min au phur a, goal khung ngei kan tum tih an hmuh khan nasa takin min fuih phur. A tawpah goal kan khung ta lo a, an lungawi lo hi ka hrethiam em em a, fan-te hi chu lawmthu hrilh fo tur kan ni," a ti a, fan-te a dem duh lo.

Hetihlai hian Everton keeper Jordan Pickford tan EPL-a cleansheet a neih vawi 100-na a ni a, hetiang tithei keeper 19-na a ni.