Chelsea an chak zo lo

Manchester United hnehtu Hull City kha Chelsea pawhin an ngam bik lo - Inrinni zan khan Stamford Bridge-ah Blues hian Hull an mikhual a, team pahnih hi 2-2 in an inhnehtawk.

Chelsea hian tlarhmaah nasa takin hma sawn mah se, tlarhnung lam a phui hleithei lo a, hei hi an buaina a nih chhunzawm zel - tun season Premier League-ah goal 10 khung tawh mah se, an lamah goal kua a lut!

Blues hian an league match hmasa pahnihah hnehna chang mah se, match hnuhnung pahnihah an chak zo ta lo. Arsenal lakah an tlawm a, tunah Hull City an inhnehtawkpui.

Chelsea tan pound maktaduai 117 man Morgan Rogers chuan goal hmahruai a khung a, Aston Villa aṭanga an lakluh forward hi a hmuhnawm tawlh tawlh em ni chu aw, tih mai tur a ni.

Mahse, Chelsea beisei angin thil a kal lo. Minute 28-naah kai thar Hull City hun a thleng a, Ryan Giles-a ball cross chu left back Jorrel Hato-a'n a chhut sual a, a hnunga ven loha awm Belloumi chuan chiang zetin goal-ah a chantir.

Stamford Bridge a reh ṭhuap a, Hull City-in an lo la duhtawk miah lo! Semi Ajayi-a ball tauhin crossbar a per hnuah, striker Oli McBurnie chuan rang takin Belloumi tan a pe a, si phurh sutna goal khungtu hian ṭha zetin hmahruaina goal a khung zui.

Dan pangngaiin Chelsea tlarhnung a pawp a, midfield a thawl em em bawk. Minute 66-naah João Pedro chuan si phurh sutna goal a khung ve leh a, Cole Palmer siamsak a ni - Blues tlarhma pathumte hian goal an thawk chhuak leh vek tihna a ni.

A pawi ber erawh Chelsea-in tlarhnung an la siam ṭha lo a, goal hnih an khung zanah an chak zo lo. Blues manager Alonso chuan, "Vawi hnih khat chu chakna goal khungna chance kan nei a, mahse, kan chhawr lo a, kan inhawng zau mah mah bawk.

"Kan khelh danah ka lawm lo a, kha aia ṭha zawka tithei tur chu kan ni. Kan phu ang tak result kan hlawh chhuak a ni," a ti a, chhuanlam a zawng lo.