Pro Fight: Manipur boxer te an che ṭha

Mizoram Labour Link LPS Pro Fight 2026 zan lina leh zan ngana chu Zirtawp zan leh Inrinni zan khan neih a ni a, zan linaah Lalnunthlanga Thingpuikuol, Manipur chuan hnehna changin Inrinni zan khan Churachandpur boxer Seigoulal chu chak bawkin Manipur boxer te an che ṭha hle.

Pro Fight vawi 12-naah hian Mizoram pawn aṭanga tel an ṭhahnem hle a, Manipur aṭangin Lalnunthlanga leh Seigoulal te bakah Onminlen, Lalremruata leh Thangboi te an lo inlan tawh.

Manipur boxer panga inlan tawh zingah hian Lalremruata chiah chak lo awmchhun a la ni a, midangin an khingpuite an hneh vek. Lalremruata hian September 9, Nilaini zan khan Nghalchawm boxer David Vanbiakthawnga chu unanimous decision-in a hneh lo.

Kumin inelnaah state pawn aṭanga inlan tur an tam a, India mai bakah Myannmar aṭanga tel tur an awm dawn bawk. State dang aiawhte inhnek zanah boruak a nun ṭhin avangin, zan dangah pawh Pro Fight boruak a san lehzual a rinawm.

Inrinni zan khan Farkawn boxer Thanchamliana chu a khingpui Lalhnehzova, Leitan Ramthar a inlan loh avangin walk over-in a chak a, boxer dang inlan thei lo an awm lo.

Hemi zan vek hian Boyka Lalhriatsanga a inlan a, 'main event'-a chhal ngam a ni. Kum sarih zet a chawlh hnua inlan leh Boyka hian Ailawng boxer, John Zonunsanga Royte chu unanimous decision-in a hneh a, Vaitin boxer hi 'fighter of the night'-ah thlan a ni bawk.