Real chak zanah Mbappe langsar

Spanish club lian Real Madrid chuan Inrinni zan khan an mikhual Rayo Vallecano chu 4-1 in an hneh a, Kylian Mbappe chuan goal hnih a khung bakah assist vawi khat a nei a, inkhel zingah a langsar ber.

Kum 27 mi Mbappe bakah Alvaro Carreras leh Jude Bellingham ten goal khat ve ve an khung a, Vallecano tan Sergio Camello goal khung chu scoreline timawitu chauh a ni.

Inkhel ṭan aṭanga minute 14-na lekah Mbappe-a'n Carreras-a penalty hlawhchhuah chu goal-ah a chantir a, French forward hian minute thum hnu lawkah Carreras-a goal khung tur a siamsak ve nghal.

Real-in inkhel an thunun chhunzawm a, minute 35-naah Bellingham-a'n an goal thumna a khung a, first half an hman zawh meuh chuan chak tur a chiang titih tawh.

Second half-ah ṭan aṭanga minute rukna lekah Camello-a'n an siphurh a sut ṭhen a, mahse goal dang an khung belh thei lo. Injury time-ah Real tan Mbappe-a'n goal khung lehin nuamsa takin a team a chakpui.

Los Blancos hian La Liga match an khelh hnuhnung berah 1-0 in Real Betis an ngam lo a, league match zawna chak loh an pumpelhna kawngah Mbappe a hmunawm hle.

Paris St-Germain forward hlui hian chance a hlah hnem a, a vanneih zan ni se hattrick siam thei tur a ni. Vinicius Junior nena an inkawp chuan Real goal bawh a tina hle.