US Open-ah Alexander Zverev hun a inher chhuak ve ta

Tennis player theihna nei sang Alexander Zverev-a'n kum 29 a nih hmain Grand Slam-ah a champion lo a; Roger Federer, Rafael Nadal leh Novak Djokovic te hun a liam hnuah Jannik Sinner leh Carlos Alcaraz te hun a inṭan lehnghal avangin German player ropui hun a thamral mai turah ngaih a ni hman. Mahse, kum French Open-ah Zverev-a'n Grand Slam hmasa ber a champion a, ni 98 hnuah US Open a champion lehnghal.

Pathianni zan final-ah Zverev hian a tawnhriat neih ṭhat hmang ṭangkaiin kum 23 mi Ben Shelton chu 6-3, 7-6 (7-2), 5-7, 6-2 in a hneh. Season ṭantirha Zverev-a'n Grand Slam a chawi ve ang em tih zawhna chu chhanin a awm a, kum 29 mi Zverev chuan French Open leh US Open nomawi a kawl ve ta.

Kawng nuam chu

Zverev hun a inherchhuah meuh chuan tun hmaa a champion theih lohna US Open champion kalkawng pawh, kawng bumboh a ni ta lo. Chutihrualin first round leh second round-ah seeded pawh ni pha lo Lorenzo Sonego leh Quentin Halys te a hmachhawn chungin, chak turin set nga a mamawh a, New York lamah chuan zan dar 2:00 dawn an thleng ve ve.

Mahse, Zverev hian final thlengin seeded player a hmachhawn san ber chu Ben Shelton a ni a, final-a a hmachhawn hi seeded pariatna a ni. Quarterfinal leh semifinal-ah pawh Zverev hian seeded player a hmachhawn lo a, third round aṭanga semifinal thlengin set a hloh tawh lo.

German player Zverev ropuina sawi nep theih a ni lo a, chutihrualin Jannik Sinner leh Carlos Alcaraz te inhliam a hmang ṭangkai viauah a ngaih theih. Sinner leh Alcaraz te hian kum 2024 leh 2025 khan Grand Slam nomawi an insem a, Zverev tan hmun a awm lo. Kuminah erawh hliam vangin Sinner a tel thei lo a, Alcaraz pawh hliam vanga French Open leh Wimbledon a khelh theih loh hnuah inlan mah se ngai a la awh lo.

Final chu

Kum 23 mi Ben Shelton hi a ball vuak a na a, quarterfinal-a Alcaraz hnehtu a nih bakah American a nih avangin ṭantu pawh a ngah zawk. Kum 2003-ah khan Andy Roddick-a'n US Open nomawi a chawi a, Shelton hi Roddick hnua American champion leh thei hmasa ber ni thei dinhmunah a ding.

Entu mipui 24,000 hmaah Zverev-a'n a tawnhriat a pho lang a, inkhel thunun chungin 6-3 in a la. Second set-ah erawh Shelton-a'n a theihna a rawn pholang a, an inhnehtawk hle. Game an inlaksak lo ve ve a, tie break-ah Zverev-a'n a serve na tak (147 mph) rawn pho chhuakin 5-0 a hma hruai hnuah 7-6 (7-2) in a la.

Set thumnaah ṭantu neih ṭhat rah a rawn lang a, Shelton-a'n a serve-ah harsatna tawk deuh mah se straight set-in Zverev chaktir a tum lo. American tennis star hian 7-5 in set a la a, champion turin beiseina a la nei zel.

Mahse, set linaah Grand Slam-a tawnhriat ngah tawh Zverev-a'n game hmasa berah Shelton-a serve a laksak nghal a, a pumpuiah Zverev hian a first serve aṭanga 85%-ah point neitu zawkah a ṭang. Set ngana khelh ngai loin Zverev hian 6-2 in set a la a, hnehna a chan hian 5-1 emaw a la tih avangin a lawm mai lo. Mahse, a coach-in a chak thu a hrilh hnuah a kut pahnih a phar chhuak nghal a, Shelton-a chibai turin net lamah a phei nghal a ni.