Zaninah Relegation battle : Ramthar Veng vs Kanan FC

Star Cement MPL13-ah zanin dar 7:00 hian table hnuai lama awm Ramthar Veng leh Kanan FC te an inhmachhawn dawn. Kanan hian point khat chauh la hmu mah se an match hnuhnung berah Mizoram Police an chelh thei a, Ramthar Veng laka hnehna an chang thei a nih chuan an inthlauhna hi point hnih chiah a ni dawn.

Season liam ta khan Kanan FC hi relegate thei dinhmunah an ding a, relegation playoff-ah erawh chiang takin an chak thung. Kuminah I Day Football-ah che ṭha mah se MPL-ah an che fuh thei lo a, match ruk lek aṭangin goal 19 an chhuah a, goal thum chauh an la khung. Mahse, Kanan tan insiamṭhat nan khua a la tlai lo a, zanin hi insiamṭhat hun chu a ni.

Ramthar Veng erawh MPL-a an khelh tawh chin thlir chuan relegation battle ni loin semifinal khelh beisei ngam tur an ni a, mah se an point dinhmun thlirin relegation battle-ah erawh an tel tho si. HC Zarzoliana hote hian hnehna an chang thei a nih chuan semifinal lam an thlir leh thei tawh ang.

Durtlang Stadium aṭangin RG Stadium-ah inkhelh a ni leh tawh dawn a, inkhelh hun hi zan a nih dawn bawk avangin entu pawh a mawi tawk an awm tura ngaih a ni. Tun dinhmuna a lan dan chuan Kanan aiin Ramthar Vengin ṭantu an nei ṭha zawk ang.