Kan tihsual a ni e - Pro Ref

Manchester City-in 1-0 in Manchester United an hneh a, inkhela goal awmchhun erawh sawisel theih tak a ni. Thil thleng tur ang a thlen fel vek tawh hnuah, Premier League referee pawl (Professional Game Referees) chuan thuchhuah siamin, Haaland-a goal khung chu pawm loh tur a nih thu an sawi!

Haaland hian minute 60-naah Gvardiol-a cross chu goal-ah a chantir a, a tirah offside phar a ni. Mahse, assistant referee-in offside a phar chhan hi Haaland a ni a, Enzo Fernandez-a offside tel mah se, hei erawh a phar chhan a ni lo.

VAR en a nih hnuah Haaland a offside lo tih a chiang a, goal-ah pawm a ni. Mahse, zawhna awm ta zawk erawh chu, "Goal luh nan Enzo Fernandez kha a inrawlh em?" tih a ni a, Enzo hian ball tawk fuh lo mah se, Haaland leh amah vengtu Lisandro Martinez a tihbuai miau avangin goal-a pawm loh tur niin a lang.

Pro Ref chuan thuchhuah siamin, "Enzo khan ball a tawh fuh loh avangin, a offside leh offside lohah khan inhnial theih tak a ni ta a ni. Kha thil thlengah khan VAR-in Enzo-a position-in thil a tihdanglam theih dan kha a thlir lo a, khelmual sira en turin referee kha hrilh ngei tur a nih laiin a hrilh lo.

"Thutlukna dik tawk lo siam a nih avangin Manchester United pawh kan be pawp tawh a, thil thlen dan kha uluk zawkin kan thlir leh ang," an ti a, awmzia erawh a nei tawh lo - United an tlawm tawh tho tho!

Hetihlai hian Premier League Match Centre chuan X (twitter) lamah Haaland-a goal pawm a nih chhan pholangin, "VAR chuan offside vanga Haaland-a goal pawm loh chu a enfiah a, enfiah a nih hnuah Haaland kha a offside lo tih pawmin, goal kha pawm a ni.

"Fernandez kha offside ngei mah se, goal luhna kawngah a inrawlh lo tih VAR chuan a pawm bawk," an ti a, Manchester derby ber kher a ni bawk si a, United fans tan chuan a na thar leh ṭhin ang.