World Taekwondo Championship-ah Daniel & Pansy

Khawvela taekwondo inelna sang ber World Taekwondo Poomsae Championship-ah Mizo pahnih an inlan dawn a, September 16, Nilaini aṭanga khelh ṭan tur inelnaah hian Daniel Lalhumthanga leh Pansy Rampanzeli te an inlan dawn - Senior Pair Under-30 category-ah India ai an awh ang.

Daniela leh Pansy te hian India aiawh tur hian 5th India Taekwondo National Poomsae Championship, 8th - 11th July 2026, Pune, Maharashtra-a khelh zawh takah khan gold medal an la a, World Championship-a India aiawh turin thlan zui an ni ta a ni.

Mizo taekwondoin pahnih hian tawnhriat an nei ṭha hle. Mualpui tlangval Daniela hi Gidae Taekwondo Club, ITI Veng chhuak niin, kum 2019 khan India tan 13th South Asian Games-ah gold a lo la tawh a, 37th National Games 2023-ah leh 38th National Games 2025-ah te Mizoram tan gold a hlawh chhuak tawh bawk - tun hnai khan NIS Diploma in Coach chu grade A-ah a pass bawk.

Chaltlang nula Pansy a mikhual bik lo. Exodus School Taekwondo Club chhuak nula hian kum 2024 khan Hong Kong-ah India tan World Championship a lo khel tawh a, quarterfinal a thleng phak - national leh international open-ah medal a lo la nual tawh.

Daniela leh Pansy te hi national level-ah ṭang dunin, ṭum hnih lai champion an lo ni tawh a, international level-ah erawh an inkawp vawi khatna tur a ni thung.

Chuncheon, South Korea-a neih tur inelna, World Poomsae Championship hi taekwondo inelna hlutnaah chuan, grade 8 niin, ram 79 aṭangin player 2636 an inlan dawn a, India hi recognise leh freestyle poomsae-a cadet, junior leh senior category hrang hrangah individual, pair leh team tein an khel dawn.

September 20, Pathianni thleng awh tur inelnaah hian India aiawhin mi 60 an inlan dawn a, Daniela leh Pansy te hi a tawp niah hian an inlan ang - nimin khan inelna tur hmun South Korea an thleng tawh.