Chak ngei kan tum dawn - Iraola

Liverpool manager Andoni Iraola chuan zanina Tottenham Hotspur nen League Cup an khelh hunah chak ngei an tum tur thu a sawi a, a ṭha thei ang bera khelh an duh thu a sawi.

Spanish manager chuan, "Premier League leh Champions League nen chuan a inang lo tih ka hria. Ni e, duh thlan tur ni ta se, EPL leh UCL-a chak chu kan duh zawk vek ang.

"Mahse, League Cup a nih avanga ngaihthah a thiang lo a, player kan siksawi emaw kan hahdamtir emaw avangin kan chak dawn tih a chiang chuang lo bawk. Hnehna chan kan duh a, a ṭha thei ang bera khelh kan duh. Theihtawp kan chhuah dawn a ni," a ti.

Liverpool hian zanin dar 12:30-ah Tottenham Hotspur chu League Cup third round khel turin an mikhual dawn a, team pahnih hi tun season-a beisei phak lo ve ve an nih avangin an inkhel tur hian ngaihven a hlawh phian!

Reds hian an league match hmasa pahniha an chak loh hnuin, Ipswich Town (2-0) an hneh a, UCL-ah Atletico Madrid (2-1) chu an hneh zui. Mahse, Inrinni zan khan tun season EPL-a chak la nei miah lo Fulham chu 0-0 in an inhnehtawkpui.

Iraola chuan Fulham nena an inkhel hi thlir kirin, "Liverpool coach ka nih hnua ka la lungawi loh ber a ni hial ang. Match hnih a zawna chak hnua inkhel kan ni a, a zawna a vawi thum nana chak kan duh hle.

"Tithei ta ngat ila, kan kal zelna turah a pawimawh dawn lutuk. Mahse, a hnungtawlh zawngin kan che a, a bik takin tlarhmaah kan hriam tawk lo," a ti a, zaninah goal khung a beisei dawn.

Hetihlai hian Tottenham pawh an ropui bik lo. Nipui transfer-ah pound maktaduai 300 chuang seng mah se, chak an la nei lo a, league match li khelh tawhah goal an la khung miah lo - Reds lakah an tlawm a nih chuan coach Roberto de Zerbi tan pressure a na sawt ang.