Asia Cup champion Mizo tleirawl

Women’s Junior Hockey Asia Cup 2026-ah India an champion a, hmeichhe team-ah hian Mizo tleirawl pahnih PC Lalrinpuii leh F. Lalbiaksiami te an tel.

Hnahthial tleirawl Rinpuii hi a tir match hnihah inlan nghalin, South Korea leh Malaysia an hnehna inkhelah a inlan ve ve. Mahse, Rinpuii a vanduai a, a inhliam zui avangin a inlan leh tawh lo.

Hetihlai hian Lunglei tleirawl Biaksiami hi alternative player-ah a awm bawk - Mizo tleirawl pahnih hi Women’s Hockey Academy, Thenzawl aṭanga inzir chhuak ve ve an ni a, Asian champion an ni ta.

Women’s Junior Asia Cup final hi Moqi, China-ah khelh a ni a, India hi elite pool-ah awmin, China, Japan, South Korea leh Malaysia te nen an awm ho a, group hmahruaitu ni chungin quarterfinal an lut.

Quarterfinal-ah hian Pakistan chu 19-0 ngawtin an sawp a, semifinal-ah South Korea chu 5-1 in an sawp a, final-ah group stage-a 0-0 a an inhnehtawkpui China chu 1-0 in an hneh.

India tan tun hi Women’s Junior Hockey Asia Cup-a a zawna vawi thum an champion-na a ni a, Junior Hockey World Cup 2027 khel turin an tling nghal.