Barcelona dang thei an la awm lo

Tun season-ah Barcelona hneh theitu an la awm lo a, Hansi Flick-a naute hian Pathianni zan khan an mikhualna ramah Levante 4-2 in an hneh a, an chak kaltluang lai an chhunzawm zel.

Barca tan Lamine Yamal-a'n goal hnih a khung a, Xavi Espart leh Karim Adeyemi ten goal khat ve ve an khung bawk. Levante tan Ivan Romero leh Roger Brugue te goal khung chu scoreline timawitu chauh a ni.

Barca an ṭha

Ciutat de València-a inkhelah dan pangngaiin Barca-in inkhel an thunun nghal a, goal khung turin an nghak rei lo. Minute ngana lekah Espart-a'n hmahruaina goal a khung a, kum 19 mi left back tan Barca tan a goal hmasa ber a ni.

Goal a luh hnuah Barca bawk an hlauhawm a, minute 19-naah Raphinha-a'n Levante keeper Mathew Ryan-a bum hnuah Yamal tan pein Spanish forward hian chiang zetin an hmahruaina a belhchhah. First half-ah Levante-in chance an nei meuh lo a, Barca an khan lo hle.

Champion nge nge

Second half ṭan aṭanga minute thumna lekah Yamal-a'n ama penalty hlawh chhuah chu, a goal hnihna atana a khung bakah team goal thumna a ni tel bawk. Awlsam takin Flick-a naute an chak dawnin a lang hman.

Mahse Levante-in an mualah tlawm an duh lo tih lantirin goal an khung. Espart-a tihsual nangchingtu Ivan Romero-a'n Joan Garcia a bum hnuah an siphurh a sut ṭhen.

Spanish champion hi an insiamṭha nghal mai lo a, minute 88-naah Joao Cancelo-a'n Levante forward Brugue lakah ball a hloh a, Brugue hian Pau Cubarsi paltlang lehin Garcia chiah a hmachhawn hnuah an goal hnihna a khung a, hun tawp dawn a ruaiah Levante an phur thar.

Injury time-ah Adeyemi-a'n halfway line pel hret aṭanga khalh ṭanin, defender pathum a paltlang hnuah tawih takin a pet goal a, Levante tan beisei a bo zui. Barca-in German forward goal hmangin an chak an nemnghet.

Engtin zel?

Inkhelh zawh hnuah Barca coach Flick chuan an khelh ṭhat tawk loh thu a sawi a, an tihsual aṭanga an inzir tur thu a sawi bawk. Chak mah se an khelh danah lawm a kim lo.

German coach chuan, "Bul ṭan ṭha hle mah ila a hnuah kan khel ṭha tawk lo a, nuamsa taka chak thei tur kha goal hnih kan chhuah avangin a harsa hman ṭep. He match hi kan en nawn leh ang a, kan tihsualte aṭangin kan inzir ang," a ti.

Catalan club hi match nga khelh tawha chak vek awmchhun an ni a, hmahruaitu ni mekin an hmelma Real Madrid nen point thumin an inthlau. Los Blancos hian kar hmasa khan Real Betis an hneh lo.

An goal khung khawl Raphinha-a'n match nga hnuah goal a khung lo a, mahse Brazilian forward hian assist pahnih a neih tho avangin kut ruakin a haw bik lo. Kum 29 mi Raphinha hi a khelh ṭhat avangin an striker thar Gabriel Jesus tan nek chhuak turin ṭan a ngai ang.