Juventus an chak zo lo

Pathianni zan Serie A inkhelah Juventus chuan 3-2 in Sassuolo an hneh zo lo a, inkhel hmuhnawm takah team pahnihten goal inkhung chhawk zak zakin, a tawpah Juve an vanduai ta zawk.

Mapei Stadium-a inkhelah second half aṭangin inkhel boruak a sang a, hun tawp dawn lamah ennawm a tam zual. Minute 65-naah Sebastiano Esposito-a'n goal hmasa ber khungin mualneitu team hma a hruaipui a, ennawm a inṭan chhunzawm. Goal khungtu Esposito hi Inter Milan forward Pio Esposito unaupa a ni.

Juve tan minute 81-naah Edon Zhegrova-a'n an siphurh a sut a, mahse an fimkhur loh luatah Sassuolo-in vaw letin Kieron Bowie-a'n counter attack aṭangin a team hma a hruai nawn pui.

Mahse Juve an beidawng bik lo a, minute hnih hnu lawkah Zhegrova bawkin an goal hnihna khungin an siphurh a sut nawn a, team pahnihten point an insem dawnin a lang hman.

Mahse injury time-ah Turin club aṭanga loan-a Sassuolo-in an hawh Vasilije Adzic-a'n chakna goal a khung a, amah neitu dik tak zawk hneh nan goal mawi tak a khung a, Juve tan a na zual ang.