Antonelli-a'n Spanish GP-ah ro a rel

Pathianni zan Spanish Grand Prix hmuhnawm takah Andrea Kimi Antonelli bawkin hnehna a chang a, Italian driver hian season duhawm bik hmang mekin tlakhniam chang nei mah se driver dangin an tluk thei meuh lo.

Madrid Sur-a intlansiakah a tir aṭangin Antonelli hi Max Verstappen leh Lando Norris te nen an inel nghal a, driver pathum te hi a tawp thlenga inelin Antonelli a dingchang. Red Bull driver Verstappen chu pahnihna niin McLaren driver Norris pathumnaah a thleng bawk.

An intlansiak zawhah kum 20 mi Antonelli chuan, "Hnehna ka chan avangin ka lawm a, inelna awlsam lo tak a ni. Mahse kei aiin Norris-a'n a phu zawk a, a vanduai vang chauha he dinhmuna ding thei hi ka ni," a ti.

Ferrari driver Charles Leclerc chu palinaah thlengin podium a lawn pha lo chiah chiah a, Mercedes driver George Russell chu panganaah a thleng bawk. Red Bull driver Isack Hadjar aia tlan Liam Lawson chuan hmasawn lehin paruknaah a thleng bawk.

Hetihlai hian driver pali - Carlos Sainz Jr, Sergio Pérez, Lance Stroll leh Lewis Hamilton te chu an tlan tluan thei lo. Mercedes driver Hamilton hi a brake a chian leh avangin lap sarihna lekah a chhuak.

Drivers table-ah Antonelli-a'n hma a hruai chhunzawm zel a, a hnuaiah a teammate Russell a awm bawk. Mercedes driver pahnih hnuaiah hian Hamilton, Norris leh Leclerc te an awm a, Verstappen chu paruknaah a awm bawk.

Point 81 zetin Antonelli a sang fal tawh a, inelna pakua la hmachhawn dawn mah se champion thei turin a dinhmun a ṭha tawh hle. Chutihrualin a chesual a nih erawh chuan midang tan lehpelh theihna chance a la awm.