Federer-a'n French Open chauh khel dawn

Roger Federer chuan kumina clay court season a hman dan tur a ti chiang a, a agent Tony Godsick chuan inelna lian French Open-ah chauh Swiss star hian inlan a tum thu a 

sawi chhuak.

Grand Slam vawi 20 champion tawh Federer hian 2017 khan clay court-ah inelna a hmachhawn miah lo, 2018 leh nikum khan tournament pahnih chiah a khel thung - kuminah chuan Paris khawpuiah chauh a inlan dawn tihna a ni.

Federer hi kum 38 mi a ni tawh, inelna zawng zawngah chuan a inlan thei tawh lo. A vanglai pawha a chet fuh hleihtheih lohna ṭhin clay court huanga match a nei tam lo pawh hi a mak hran lo.

Godsick chuan, "Ruahman dan a nei tawh a, a tum dan chuan Roland Garros-ah chauh a inlan ang," a ti. Federer hian tun hnaiah match a khel tam tawh lo, January thlaa khelh zawh tak Australian Open-ah pawh inelna pangngai hmachhawn lawk miah loin a inlan.

Swiss star hi karleh chhunga khelh tur Dubai Tennis Championships lamah a inlan dawn, a hnu lamah chuan California khawpuiah BNP Paribas Open a khel leh bawk ang - clay ang lo takin grass court season hman hunah erawh a inkhelh tam leh deuh a rinawm.

Federer hian Grand Slam a khelh hnuhnung pasarihah hlawhtlinna a chang zo lo, major title a lak hnem record 20 titles chu vawi 19 champion tawh Rafael Nadal leh Novak Djokovic (17 titles) te lakah a nghing mek.

World number 3 Federer chuan, "Beiseina ka la nei a, a lo la thlen ngei pawh ka ring. Season hmasa ang bawkin ṭha takin kum tluana ka inkhelh theih ka ring," tiin engtik niah emaw chuan Grand Slam nomawi a chawi leh a rin thu a sawi.