Zanin dar 7-ah Saikhamakawn vs Chanmari FC
Star Cement MPL13-ah zanin dar 7:00 hian Saikhamakawn leh Chanmari FC te an inkhel dawn a, Lalrindika Hmar kaihruai SKK hian Chanmarians hi an hneh a nih chuan IFL club chungah an awm thei dawn. Rochhingpuia hote hi a sang pathumaah an awm pha tawh lo a, SKK an hneh lo a nih phei chuan vawi khat inkhelh kual zawhah semifinal khel pha chinah an tel thei dawn lo.
Saikhamakawn hian MPL13-ah lei rem an la rap hlei thei lo a, chet ṭhat zawn an nei thei meuh lo. SKK hian Kanan laka hnehna an chan zawhah MLS lakah an tlawm lehnghal a, relegation zone-ah an awm mek .Lawngtlai club laka an chak loh ṭum hian keeper Lalhruaitluanga Kawlni chu hun tawp dawnah a inhliam a, ṭum thum substitution an siam tawh avangin player 10-in an khelh a ṭul phah.
Khawzawl tlangval Bawihpuia hi hliam vangin a inlan thei dawn lo a, a thachangdawltu Lalhruaizela tan hming chher theihna hun ṭha a ni dawn. Chanmari an hmachhawn dawn avangin SKK tan tlarhnung tih phui ṭhat a ṭul dawn a, chutihrualin tlarhma lam an pawimawh tel.
SKK hian Lalrothlanga leh K. Roluahpuia te kawl mah se club tana goal khung tam ber erawh midfielder K. Lalremmuana a ni thung. Champhai tlangval Remmuana hian MPL13-ah goal li a khung tawh.
Chanmari FC-in insiamremna hun a hmang chho mek a, MPL-a result ṭha neih an duh bakah IFL tana inpuahchahna a kal chho ṭan ang. Aizawl FC an hmachhawn ṭumin player thar Lalliansanga'n bul a ṭan a, bench aṭangin R. Ramdinthara a lut bawk. Liansanga leh Tharpuia te match fitness a la ṭha tawk lo a, club tharah an theihna tak an la pho chhuak lo.
Rochhingpuia hoten beisei ang bul ṭan lo mah se Aizawl FC lakah chak phu zawk an nih avangin inrintawkna an neih let a rinawm a, champion an tum a nih chuan tlarhnung an tihphui a ṭul. Season liam ta khan Chhinga hnuaiah tho, league match 14 aṭangin goal 10 chauh an chhuah a, tun season-ah goal sarih an chhuah der tawh. Chanmarians tan tlarhma lam tah hriam aiin tlarhnung rem phui a pawimawh hmasa a, chutihrualin SKK lakah erawh chak ngei a ṭul thung.