Zaninah East Bengal inkhel dawn

Indian Super League champion East Bengal an chawl hman lo - zanin dar 9:30 hian AFC Champions League Two-a an match hmasa ber an khel dawn a, Jordan club Al-Hussein SC chu khualmualah an lenchilh ang.

Al-Hussein SC hi Jordanian Premier League champion an ni a, an player zingah Brazil Under-20 tan pawha khel tawh centre back Pedro Henrique, Romanian winger Andrei Bani, Primeira Liga thlenga lo khel tawh Brayan Riascos leh Nigerian forward Paul Komolafe te an tel a, East Bengal tan a awlsam dawn lo.

Kolkata club tan Mizo striker Edmund Lalrindika chuan hmun pawimawh a chang leh tura beisei a ni a, defender Lalchungnunga leh David Lalhlansanga ten inkhel bul an ṭan chiah lo a nih pawhin, bench aṭanga an luh tho a rinawm.

Durand Cup champion hlim East Bengal hi season hmasa ISL an champion avangin AFC Champions League Two Elite hi preliminary round aṭangin an khel a, Kuwait club Al-Arabi chu 4-1 a sawp chungin an inpet kai - kha inkhelah khan Mizo striker David-a'n goal khungin, assist vawi khat a nei bawk.

East Bengal hian group D-ah zanina an hmachhawn tur Al-Hussein bakah Iraq club ṭha Al-Shorta leh Oman club Al-Seeb an awmpui a, group tin aṭang hian a sang pahnihte chuan round of 16 an lut ang.

Asian Football Confederation hnuaiah AFC Champions League Elite chu league sang ber a ni a, a hnuai chiahah Champions League Two a awm - Europe-a Europa League tlukpui tihna a ni.