Leeds-in Newcastle an sawp!

Season hmasa Premier League-a 14-na Leeds United-in result ṭha an neih chhunzawm zel a, Thawhṭanni zan khan league match inkhelah Newcastle United chu 4-1 ngawtin an sawp!

Daniel Farke enkawl Leeds hian minute 32-naah goal hmahruai an khung a, Ao Tanaka shot chuan Sean Steur leh Lewis Miley te a per hnuah goal-ah a lut - mualneitu team-in 1-0 in hma an hruai.

Leeds-in an duh tawk mai lo. Jayden Bogle leh Dominic Calvert-Lewin ten first half chhungin an khung belh leh a, 3-0 a ni. Noah Okafor-a'n minute 59-naah a belhchhah zui a, Newcastle United an mualpho a ni ber mai.

Minute 90 hmain chak tur a chiang tawh tiin a sawi theih a, hun tawp dawna Bazoumana Touré goal khung chu Magpies mualpho zualpui khuhna chauh a tling tawh.

Leeds United-in league match li an khelhah tlawm an la nei miah lo. Vawi hnih chu an khingpui inhnehtawkpuiin, vawi hnih chu a chak zawkah an ṭang a, EPL table-ah point riat hmuin, pathumna an ni mek.

Hetihrual hian coach thar Matthias Jaissle enkawl Magpies tan tun season-a an tlawm hmasak ber a ni a, Leeds an hmachhawn hma hian Liverpool (2-2) leh Bournemouth (2-2) inhnehtawkpuiin, Tottenham Hotspur (2-0) an hneh thei a, mahse, Leeds hmaah chuan an zam ral.