Liverpool-ah Milner a kir

Season hman zawh taka professional football chawlhsantu, Liverpool midfielder hlui James Milner chu Liverpool-ah a kir a, a kir dan erawh footballer ang ni tawh loin, youth team zinga coaching hna thawk turin a ni.

Hetihrual hian Milner hi coach nghet tura kir pawh a ni lem lo a, UEFA Pro Licence neih tuma a beih mekna kawngah Liverpool-ah hian a inzir niin an sawi - age level aṭanga bul ṭanin, youth team category hrang hrangah hna a thawk dawn.

Kum 40 mi Milner hi Liverpool academy director Alex Inglethorpe chuan an youth team-a hnathawk tur hian a sawm nia sawi a ni a, English midfielder hian rei tak a inkhelh hnuah coaching lama kal a la tum cheu niin a lang.

Leeds United aṭanga a professional zinkawng zawh ṭantu Milner hian kum 2015 khan Manchester City chhuahsanin Liverpool a zawm a, Jurgen Klopp-a hnuaiah player pawimawh niin, Vice Captain dinhmun hial a luah hman.

Reds tan match 332-a goal 26 khung a, assist vawi 46 neitu Milner hian Liverpool-ah nomawi chawi theih ang chu a chawi kim a, Premier League, FA Cup, Champions League, League Cup, FA Community Shield, Champions League, UEFA Super Cup leh FIFA Club World Cup-ah te champion nomawi a chawi vek!

Milner hian Premier League-ah season 24 zet chu a zawnin a khel a, match 658 a inlan - a record a khum sak tak Gareth Barry-a'n match 653 a khel a, a record hi a ropui hle.