Kum 52 hnua Europe-a inlan tur Sunderland

Zanin aṭangin Europa League khelh ṭan a ni leh dawn a, Premier League club Sunderland chuan kum 52 hnua a vawi khat nan Europe inelnaah an inlan ang. Zanin dar 12:30-ah AZ Alkmaar an mikhual dawn.

Sunderland hi Europe-a an inlan hnuhnung ber chu 1974 daih tawh kha a ni a, 1972-73 season-ah FA Cup-ah Leeds United hneha an champion avanga khel thei an ni. Hetihlai hian an inelna hi UEFA Cup Winners' Cup a ni a, Europe ram hrang hranga domestic cup champion ten khel ṭhinin 1999 khan tihtawp a ni.

Thawhlehna

Kum 2007-a Championship Division-a an champion hnuah Black Cats hian kum 10 chhung EPL an khel a, mahse 2017 khan David Moyes-a'n a enkawl laiin an relegate a, hemi hnu hian an reh rei hle.

An relegate hnu hian beisei an pha lo zui a, league-ah table mawngphah luahin an club chanchina a vawi khatna atan League One-ah an tla hial. League One-ah kum li an awm hnuin 2022 khan Championship-ah an kai leh a, kum li bawk hun an hman hnuah season hmasa khan Premier League-ah an lo kir.

Kum 10 dawn hnua an lo let lehnaah Black Cats hian beisei phâk bakin season an hmang ṭha a, pasarihnaah season kharin Europa League an khelh theih phah. Season tawp lamah chesual zeuh lo se Champions League khel thei dinhmunah an ding.

Engtin zel?

September 12, Inrinni zan khan Sunderland hian an mualah Arsenal chu 2-0 in an ngam lo a, Europa League-a an match hmasa ber turah hian an thinrim hrikthlak an tum dawn bakah, chak loa bul ṭan an duh lo ang.

Black Cats tan Granit Xhaka chu an innghahna a ni leh dawn a, Swiss midfielder bakah hian Robin Roefs, Nordi Mukiele, Enzo Le Fee leh Brian Brobbey te an nei a, an forward thar Malick Fofana-a'n bul a ṭan a beiseiawm.

Chutihrualin September 20, Pathianni zanah Sunderland hian Manchester City an hmachhawn leh nghal dawn a, Régis Le Bris-a'n player ṭhenkhat a hahdamtir a nih pawhin a mak lo ang.

Player neih dan en chuan Sunderland an chungnung zawk angah ngaih theih a nih laiin AZ hian Jordy Clasie an nei a, an captain hi Southampton tana khel tawh a nih avangin English game a hrechiang dawn.

Clasie bakah hian Saints leh Watford tan pawha lo khel tawh Wesley Hoedt an kawl bawk a, Eredivisie-a pahnihna an nih mek bawk avangin zuam ngawt chi an ni dawn bik lo.